Sámediggeráđđi lea duhtavaš go ráđđehus dál evttoha rievdadit Sámedikki ja Norgga eiseválddiid gaskasaš bušeahttaproseassa. Várrepresideanta Johan Mikkel Sara oaivvilda ahte dán jagi stáhtabušeahttaevttohus duođašta ahte dárbbašuvvojit duohta ja geatnegahtti šiehtadallamat gaskal Sámedikki ja ráđđehusa.
- Sámedikki gáibádusat 2007 stáhtabušehttii ledje hui mearálaččat ja ledje biddjojuvvon daid dárbbuid mielde maid mii oaivvildit sámi servodagas leat. Ráđđehus vállje dattetge badjelgeahččat eatnašiid min gáibádusain, ja juolluda duohtavuođas dušše birzzehis lassáneami Sámediggái. Dárbbuid ja juolludemiid gaskasaš dássehisvuođa dat ferte Sámediggi gillát, vaikke vel lea ge ráđđehus gii lea dahkan mearrádusa, deattuha Sara.
2007 stáhtabušeahttaevttohusas dadjá ráđđehus ahte lea dárbu rievdadit prosedyraid mo ráhkadit Sámedikki bušeahta. Sámediggi čađahii 2005 čavčča, Sámedikki ja ráđđehusa gaskasaš ráđđádallanšiehtadusa vuođul, ráđđádallančoahkkimiid stáhtabušeahta birra. Várrepresideanta Johan Mikkel Sara deattuha ahte bušeahttaprosedyrat fertejit mielddisbuktit duohta šiehtadallamiid gaskal Norgga stáhta ja Sámedikki.
- Sámediggi, našuvnnalaš parlameantan, ii sáhte šat sáddet politihkalaš sávvanlistta dakkár bajit dássái, mas alddis lea politihkalaš beroštupmi bušeahttamearrádusian. Dát heađušta duohtavuođas Sámedikki politihkalaš arenan. Geatnegahtti bušeahttašiehtadallamat leat guhká sávvojuvvon, ja mii leat danne ilus go maiddái ráđđehus dál oaidná dan dárbbašlažžan, loahpaha Sara.