Sámediggeráđđi evttoha nannet juolludemiid sámi kultuvrii 9,9 miljon ruvnnuin boahtte jagi bušeahtas. 5 miljon ruvnno evttohuvvo guovttegielalašvuođa nannemii, ja 1,8 miljon ruvnno fas juolluduvvo sámi ásahusaid ja organisašuvnnaid nannemii.
- Mii lasihit maiddái juolludeami ovttasbargošiehtadusaide fylkkasuohkaniiguin 1,7 miljon ruvnnuin. Ovttasbargu fylkkasuohkaniiguin lea lihkostuvvan hui bures, ja mii háliidit dál dahkat oainnusin ja ovddidit dán buori ovttasbarggu guovlluid sámi kulturdoaimmaid oktavuođas, dadjá Jonassen.
500.000 ruvnno evttohuvvo máttasámegiela digitála stávendárkkisteami ovddideapmái, ja ráđđi evttoha maiddái lasihit stipeandajuolludemiid sámi joatkkaskuvlaoahppiide 300.000 ruvnnuin. Dan lassin evttoha ráđđi nannet juolludemiid sámi girjebussiide 500.000 ruvnnuin ja 370.000 ruvvno sámi kulturmuitosuodjalusa nannemii.
- Mii leimmet vuordán buoret ekonomalaš rámmaid Norgga eiseválddiin, ja dán jagi bušeahta ferte geahččat daid rámmaid ektui maid Sámediggi lea ožžon ráđđehusas, dadjá Jonassen.