Bálkkašumi ákkasteamis daddjojuvvo bálkkašumi vuoitiid birra:
Jouni Moshnikoff
oažžu giellabálkkašumi Gollegiella 2006 su stuorra áŋgiruššama ovddas gitta 1970-jagiid rájes eatnigielainis, nuortalašgielain, mainna son ain áŋgiruššá.
Harald Gaski
oažžu giellabálkkašumi Gollegiella 2006 su stuorra giellaovddidanbarggu ovdda. Son lea guhká leamaš mielde ovddideamen sámegiela servodagas ja son lea, erenoamážit dutkamisttis, leamaš mielde loktemin sámi girjjálašvuođa árvvu ja dahkamin dan dovddusin miehtá máilmmi. Son lea maid viehka muddui váikkuhan dan ahte sámegiella lea šaddan ođđaáigásaš gulahallangiellan.
Gollegiella-bálkkašumi birra
Sámeministarat ja sámediggepresideanttat Suomas, Ruoŧas ja Norggas leat ásahan davviriikkalaš sámi giellabálkkašumi – Gollegiella. Bálkkašumi sturrodat lea 100 000 norgga ruvnno ja geigejuvvo ovttaskasolbmuide, joavkkuide, organisašuvnnaide dahje ásahusaide mat leat áŋgiruššan sámegiela ovddidemiin. Bálkkašupmi geigejuvvo juohke nuppi jagi Suoma, Ruoŧa, Ruošša ja/dahje Norgga beale vuoitái. Bálkkašupmi geigejuvvui vuosttaš gearddi 2004:s.