Eamiálbmogiid máhtolašvuođat ja searvan hálddašeamis šaddet leat guovddáš fáddán Sámedikki presideanttas Aili Keskitalo, go son dán vahkus searvá Árktalaš ráđi čoahkkimii Salekhardas Ruoššas. Resursageavaheapmi, birasgáhtten, dálkkádat ja biologalaš šláddjivuohta leat áššiid gaskkas mat guorahallojuvvojit.
Sámedikki presideanta Aili Keskitalo searvá dán vahkus Norgga delegašuvnna fárus Árktalaš ráđi ministtarčoahkkimii golggotmánu 25. – 26. b. Salekhardas Ruoššas. Dán sáttagotti jođiha olgoriikaministtar Jonas Gard Støre.
- Mun lean oaidnán Norgga ovdagotti Árktalaš ráđi prográmmaevttohusa, ja lean registreren ahte ollislaš ekovuogádatvuođđuduvvon resursahálddašeapmi deattuhuvvo boahtteáiggis. Eami¬álbmogiid erenoamáš máhtolašvuođain, ja dat mearkkašupmi mii daid viidásetgaskkus¬teamis lea árktalaš servodaga birra áddejupmái, lea ain stuorra mearkkašupmi dasa movt sihkkasrastit nana ceavzilis ovddideami árktalaš guovllus oaivvilda Keskitalo.
Son deattuha danne ahte eamiálbmotdimenšuvdna ja eamiálbmogiid máhtolašvuođat ja -gelbbolašvuohta galget leat lunddolaš oassin dain áššiin mat galget guorahallojuvvot, nugo resursageavaheapmi, birasgáhtten, dálkkádat ja biologalaš šláddjivuohta. Dáid čuoggáid áigu Sámedikki presideanta deattuhit ministtarčoahkkimis Salekharddas.
- Mun áiggun maid geavahit mátki vejolašvuohtan hupmat stáhtaráđiin Jonas Gahr Støre Sámedikki rolla birra davviguovlopolitihkas. Mun áiggun sierra ovddidit Sámedikki oainnu Árktalaš ráđi čállingotti ásahanáššái Romsii. Deaŧalaš lea sihkkarastit eamiálbmogiid ovddastusa dákkár čállingottis, dadjá Keskitalo.
Árktalaš ráđđi
Árktalaš ráđđi lea áidna guovllulaš ovttasbargoorgána, mas leat mielde buot dat gávcci árktalaš riikka: vihtta davviriikka, USA, Kanada ja Ruošša. Dasto leat ráđis bissovaš oasseváldit geat ovddastit árktalaš guovlluid eamiálbmogiid. Sámiráđđi lea okta dan guđa eamiálbmotorganisašuvnnas mat servet buot dásiin Árktalaš ráđis. Norga váldá dál badjelasas Árktalaš ráđi ovddagoddeodaimma áigodahkii gitta 2008 rádjai.