Sámedikki presideanta ja Sámi parlamentáralaš ráđi sadjásaš presideanta, Aili Keskitalo, dovddahii ahte lea duhtavaš go Davviriikkaid Ráđđi vuoruha barggu hukset buriid, rájiidrasttideaddji ortnegiid.
Keskitalos lei otne sáhkavuorru Davviriikkaid Ráđi sešuvnnas, mas son earret eará deattuhii man deaŧalaš lea davviriikkalaš sámekonvenšuvdna.
Davviriikkalaš sámekonvenšuvdnaevttohus, maid davviriikkalaš áššedovdijoavku lea ráhkadan, geigejuvvui ministtariidda geain lea ovddasvástádus sámi áššiin ja Suoma, Norgga ja Ruoŧa sámedikkiid presideanttaide, ja dat lea leamaš gulaskuddamis giđđat 2006. Dáid gulaskuddancealkámušaid čoahkádus lea čalmmustuvvon midjiide, ja midjiide lea lohpiduvvon ahte Suoma, Norgga ja Ruoŧa ráđđehusat áigot čilget iežaset oainnuid jagi sisa. Sámi parlamentáralaš ráđđi lea ávžžuhan Suoma, Norgga ja Ruoŧa sámedikkiid ja ráđđehusaid doarjut davviriikkaid sámekonvenšuvdnaevttohusa nugo dat lea ovddiduvvon, dajai Keskitalo.
Son muittuhii maid ahte sámit guhkes áiggi juo leat oččodan ollesárvosaš ovddastusa Davvi¬riikkaid Ráđis, ja dovddahii ahte doarju iešstivrejeaddji guovlluid sávaldaga oažžut dán lágan ovddastusa.