Presideanta, Davviriikkaid Ráđi lahtut,
Sámi parlamentáralaš ráđi, Suoma, Norgga ja Ruoŧa sámedikkiid gaskasaš parlamentáralaš ovttasbarggu ovddas, háliidan dovddahit ahte mii leat duhtavaččat dainna go Davviriikkaid Ráđđi lea bidjan guovddážii barggu bargat davviikkaid rádjacakkiiguin.
Sámit orrot njealji riikkas. Beaivválaččat buktet rádjacakkit midjiide hástalusaid. Sierralágan našonála standárddat, lágat ja hálddašanortnegat vásihuvvojit rádja¬caggin, ja dat váikkuhit negatiivvalaččat min vejolašvuhtii gozihit min oktasaš kultuvrra, giela ja eallinmálle. Mii beroštit ollu buot lágan politihkalaš ságastallamiin maid áigumuššan lea njeaidit formalalaš ja fysálaš rádjacakkiid daid riikkaid gaskka gos mii orrut.
Suoma, Norgga ja Ruoŧa sámedikkit oaivvildit ahte davviriikkalaš sámekonvenšuvdna lea mielde ovttastahttimin vuoigatvuođaid riikkarájiid rastá. Mii jáhkkit, ahte dat sáhttá leat mielde sihkkarastimin sámiide positiivvalaš servodat¬ovddideami, dainna lágiin ahte leahkinvuođđu suodjaluvvo ja dohkkehuvvo ahte álbmot ieš galgá beassat mearridit iežas ovdánahttima ja ahtanuššama.
Davviriikkalaš sámekonvenšuvdnaevttohus, maid davviriikkalaš áššedovdijoavku lea ráhkadan, geigejuvvui ministtariidda geain lea ovddasvástádus sámi áššiin ja Suoma, Norgga ja Ruoŧa sámedikkiid presideanttaide, ja dat lea leamaš gulaskuddamis giđđat 2006. Dáid gulaskuddancealkámušaid čoahkádus lea čalmmustuvvon midjiide, ja midjiide lea lohpiduvvon ahte Suoma, Norgga ja Ruoŧa ráđđehusat áigot čilget iežaset oainnuid jagi sisa. Sámi parlamentáralaš ráđđi lea ávžžuhan Suoma, Norgga ja Ruoŧa sámedikkiid ja ráđđehusaid doarjut davviriikkaid sámekonvenšuvdnaevttohusa nugo dat lea ovddiduvvon.
Mun áiggun dán oktavuođas gaskkustit dan ahte davviriikkaid sámekonvenšuvdna lea boktán maid riikkaidgaskasaččat beroštumi. Buriid rájiidrasttideaddji ortnegiid ohcalit ollu álbmogat mat leat juhkkojuvvon politihkalaččat dahkkojuvvon rájiiguin. Davviriikkat galggašedje fas ain čájehit buori ovdamearkka: Davviriikkaid Ráđđi berre doarjut davviriikkaid Davviriikkat galggašedje fas ain čájehit buori ovdamearkka: Davviriikkaid Ráđđi berre doarjut davviriikkaid sámekonvenšuvnna ja váikkuhit dan ahte dat johtilit mearriduvvo.