- Mis leat guokte almmolaš giela Norggas: dáro- ja sámegiella. Sámegielat dihtor- ja neahttageavaheaddjiin lea stuorra dárbu prográmmagálvui mii buvttášii sámegiela buorebut olámuddui dihtoroktavuođas. Hui ollu sámegielagiin lea dat vuolggasadji ahte sii eai máhte iežaset giela čállit, muhto máhttet gal eatnigielaset njálmmálaččat. Fálaldat nu gohčoduvvon hállansyntese-prográmma hárrái livččii danne hui deaŧalaš ja váillahuvvon gaskaoapmi mainna nannet sámegiela buot dásiin, dadjá várre¬presideanta Johan Mikkel Sara.
Ođasmahttindeparemeanta lea bivdán Telenora ja Microsoft ovddidit dihtorprográmma mii sáhttá rievdadit teavstta prográmmain ja neahtas njálmmálaš girjedárrun ja ođđadárogillii. Prográmmagálvu lea nuvttá ja dan sáhttá geavahit dušše Windows-plattformen bokte. Sámediggi álggahii 2005s barggu ovddidit sierra stávenreaiddu ja sátnejuohkinprográmma davvisámegillii ja julevsámegillii. Prográmma galgá sáhttit geavahit Windows, Linux ja MaxOS bokte. Seammás lea Sámediggi ráhkadan plánaid ovddidit sámi hállansyntese.
- Go ráđđehus ii váldde vuhtii sámegiela iežas ovddidanplánain, de rehkenasttán mun ahte dat čájeha dáhtu ruhtadit Sámedikki prošeavtta ovddidit sámegiela hállansyntese. Min rehkenastimat čájehit ahte dat šattašii máksit 4,2 miljon ruvnno giela nammii. Davvisámegiella ja julevsámegiella leat vuosttaš vuorus áigeguovdilat, deattuha Sara.