Sámedikki presideanta Aili Keskitalo lea beahtahallan go ON 3. komitea dál lea mearridan maŋidit ON eamiálbmotjulggaštusa meannudeami mii loahpalaččat lea dohkkehuvvon ON Olmmošvuoigatvuođaráđis. Geavahusas ballá Keskitalo ahte dán mearrádusa geažil rievdá julggaštusa sisdoalu, ja ahte loahpalaš julggaštus sáhttá sakka láivudit eamiálbmogiid vuoigatvuođaid.
- Mii dárbbašit čielga ja nana julggaštusa. Riikkaidgaskasaš eamiálbmotjulggaštusa hárrái, 24 jagi šiehtadallamiid maŋŋá lea bahčat oaidnit dákkár bohtosa, measta moalas. Dasto balan ahte dát mearrádus geanohuhttá sakka gieskat ásahuvvon ONa Olmmošvuoigatvuođaráđđi. Buohkanassii lea dát sevdnjes beaivi máilmmi eamiálbmogiidda, oaivvilda Keskitalo.
Namibia dat, máŋgga afrihkalaš riikka beales, mii ovttas USAin, Kanadain, Austráliain ja Ođđa Selánddain lihkostuvai oažžut eanetlogu maŋidit julggaštusa ”addin dihte eanet áiggi konsultašuvnnaide” nugo čuožžu mearrádusas. Go julggaštus dál lea bissehuvvon ONa bajimuš dásis, de lea eahpečielggas movt besset dahje besset go šat eamiálbmotovddasteaddjit searvat julggaštusa loahppameannudeapmái, go dušše stáhtaid ovddasteaddjit leat lahttun ONa 3. komiteas.
- Eamiálbmogiidda lea dovddahuvvon ahte besset searvat prosessii ja leat mielde mearrideamen, ja de bissehuvvo olles proseassa ovdalaš loahppamearrádusa. Erenoamáš ahkit lea oaidnit ahte juste stáhtat main leat stuorra eamiálbmotjoavkkut háliidit ođđasis meannudišgoahtit eamiálbmotvuoigatvuođaid, dadjá Keskitalo.