Sámedikki presideanta Aili Keskitalo lea duhtavaš Ráđđehusa strategiijain davveguovlluid várás, ja deattuha erenoamážit ahte Norgga eiseválddit bidjet eamiálbmogiid vuoigatvuođaid vuođđun guovlluid ovddideapmái.
- Dát lea buorre vuođđun Sámedikki ja Ráđđehusa gaskasaš ovttasbargui davveguovlluid ektui. Eamiálbmogiid vuoigatvuođaid dohkkeheapmi mearkkaša ahte mii buohkat oažžut ávkki dan vejolašvuođas mii lea ealáhusaid, dutkama ja resursahálddašeami boahttevaš ovddideamis, mii addá sápmelaččaide ja davveguovlluid eará eamiálbmogiidda nannoset sajádaga, dadjá Keskitalo.
Keskitalo deattuha ahte nana ovttasbargu rájiid rastá, sihke stáhtaid ja eamiálbmogiid gaskkas, lea dárbbašlaš davveguovlluid ollislaš ja dohkálaš oddideapmái. Dán vahku doarjjui maiddái Sámedikki dievasčoahkkin Sámediggeráđi dieđáhusa ”Eamiálbmogiid boahtteáiggi ovddideapmi”, Sámedikki riikkaidgaskasaš áŋgiruššansurggiid birra. Davveguovlluid ovddideapmi lea okta dan golbma váldoáŋgiruššansuorggis mat leat namuhuvvon das.
- Lean ilus go Sámedikkis ja Ráđđehusas lea ovttamielalašvuohta offensiiva ja riikkaidgaskasaš áŋgiruššamis nannen dihtii eamiálbmogiid vuoigatvuođaid ja eallineavttuid. Sámedikki bealis áigut vuoruhit ONa riikkaidgaskasaš vuoigatvuođabarggu, Barentsguovllu, ja erenoamážit čalmmustuhttit hástalusaid dálkkádatrievdama oktavuođas, dadjá Keskitalo.
Doaimmahusaide:
Sámedikki várrepresideanta oassálastá Ráđđehusa davveguovlluid oahppásmahttimii Romssas.