Almmuhan
Kuhmunen, John-Marcus.
Maŋumustá rievdaduvvon 15.01.2007
- Ii leat vuoiggalaš Bargiidbellodagas geahččalit ávkkástallat dákkár duođalaš áššiin. Dán áššis lea deaŧalaš ain čalmmustahttit daid nuorra nieiddaid, geat leat hui váttis dilis. Ferte čohkket buot fámuid dán áššis ja buoremus lági mielde veahkehit Guovdageainnu nuoraid ja servodaga, dadjá Sámedikki presideanta Aili Keskitalo.
Sámediggi lea čađahan ollu doaibmabijuid nannen dihtii Guovdageainnu servodaga. Earret eará álggahii Sámediggi jagis 2005 ságastallama ja ovttasbarggu Dievdduidservviin dainna áigumušain ahte čađahit prošeavtta guottuidduddjonbarggu oktavuođas. Dievddut čađahit deaŧalaš barggu vai almmáiolbmot ieža váldet ovddasvástádusa das ahte eai dahkkojuvvo rihkkumat nuorra nieiddaid vuostá. Sámediggeráđđi bijai 100 000 ruvnno prošektii mii buori muddui ruhtaduvvui Sámedikki dásseárvoruđaiguin.
Sámediggeráđđi lea maid juolludan 300 000 ruvnno čađahit dakkár doaibmabijuid Guovdageainnu Nuoraid Siiddas, mat eastadivčče nuoraid geavaheames gárrenávdnasiid. Mii leat dál ságastallamin suohkaniin ja organisašuvnnaiguin, mat sáhttet leat mielde ain eanet áŋgiruššat guottuidduddjonbargguin dás dohko.
- Mannan jagi rájes lea Sámediggi juolludan hui ollu ruđaid prošeavttaide maid ulbmil lea duddjot guottuid. Sámediggeráđđi čalmmustuhtii maiddái veahkaválddi ja sekuálalaš rihkkumiid dásseárvopolitihkalš čilgehusastis Sámedikki dievasčoahkkimii guovvamánus 2006. Guottuidduddjon veahkaválddi ja seksuálalaš rihkkumiid ektui lea deaŧalaš bargu mii ánssáša politihkalaš beroštumi beroškeahtta das leat go nissonolbmot vai almmáiolbmot geat leat ovddastuvvon Sámedikkis, deattuha Keskitalo.