Sámedikki čoahkkinjođihangoddi mearridii juovlamánus 2006 Sámediggái ođđa beassanmearrádusaid. Mearrádusaid ulbmilin lea leamaš nannet sihkarvuođa sámediggeviesus ja buoridit bargiid bargobirrasa.
- Okta deaŧalaš rievdadus lea dat ahte mii dál háliidit diehtit buohkaid geat leat sámediggeviesus, earret eará ahte registreret gussiid. Dán mii bargat dan dihte vai nannešeimmet buohkaid sihkarvuođa geat leat Sámediggeviesus. Nubbi eará deaŧalaš rievdadus lea ahte bargiid sáhttá filbmet, govvet dahje báddet aivve dalle go bargit dasa mihtet ja jos sii ieža háliidit mediačuvgii, dadjá dievasčoahkkinjođiheaddji Josef Vedhugnes.
Son deattuha ahte Sámedikki ulbmilin lea ahte preassas galget leat buorit bargoeavttut Sámedikkis, ja lea rabas ságastallat vejolaš čuoggáid birra mat hehttejit sin barggu, vaikko mearrádusat leat ge ovdal leamaš gulaskuddamis.
Danne bovdet mediaid ovddasteaddjiid diehtojuohkinčoahkkimii beassanmearrádusaid birra, vuossárga guovvamánu 12. b. dii. 13.00 auditorias Sámedikkis Kárášjogas.