Seminára duogáš lea ahte sámi meahccegeavahus lea rievdan áiggiid mielde, nu go servodat ge lea. Sámediggái lea dehálaš oažžut dieđuid daid vásáhusaid ja hástalusaid birra mat gusket sámi meahccegeavaheapmái. Beroštumit mat gusket meahcásteapmái lea máŋga; johtolat, viessohuksen, friijaáige- ja ealáhusbarttat, geaidnohuksen, bieggamillut ja čierastanrustegat, ruvkedoaimmat, guollejávrriid ja luomejekkiid buorideapmi, guohtumat, johtingeainnut, muorra- ja avdnasviežžan, mátkkoštanealáhus j.e.
Seminára galggai buktit vástádusaid dasa ahte makkár hástalusat leat sámi geavaheaddjiin go ieža ja earát galget atnit ávkki meahccis, ja mo sáhttá ovttastahttit árbevieru ja ođđahutkama luonddu eavttuid mielde.