- Norgga eiseválddit bidjet dál ollu resurssaid Norgga museadoaimmaide, muhto dán lassáneami eat leat oaidnán sámi museaid ektui. Go mii rávvet nannoset ovttasbarggu dálá kulturguovddážiid ja museaid gaskkas, de dat lea danne vai olles fágalaš gelbbolašvuohta ja ollislaš sámi perspektiiva nannejuvvo ja seammás váikkuhit ahte kulturguovddážat ja sámi museat jođihuvvojit beaktileappot, dadjá várrepresideanta Johan Mikkel Sara.
Sámediggeráđđi rávve Sámedikki dievasčoahkkima váldit atnui ođđa modealla mo organiseret Davit Nordlándda ja Mátta-Romssa sámi museadoaimmaid. Dát mearkkaša ahte sámi museat buorebut oktiiordnejuvvojit sámi kulturguovddážiiguin ja besset mielde daid ovddideapmái. Ája sámi guovddáš, Várdobáiki sámi guovddáš, ja Árran julevsámi guovddáš ožžot váldoovddasvástádusa sámi museadoaimmain iežaset guovlluin.
- Mun deattuhan ahte stáhtas lea ovddasvástádus das ahte maiddái museaođastusa sámi oassi oažžu ekonomalaš resurssaid. Sámi museadoaimmat leat álggahandásis, ja mii fertet oažžut vejolašvuođa ásahit ođđa sámi museaid ja nannet daid mat leat jo ásahuvvon, dadjá Sara.