Sámediggi ja sámi álbmot sávvet lihku Gonagaslaš Majestehtii Gonagas Harald Vii su 70-jagi riegádanbeivviin. Dan oktavuođas geige Sámedikki presideanta Aili Keskitalo parlameantta ja álbmoga lihkusáváldagaid otnáš lihkusávvandeputašuvnnas. Skeaŋkan G.M. Gonagas Harald Vii lea oljomálagovva ”Vávvu” maid dáiddár Synnøve Persen lea dahkan.
- Min álbmotráhkis monárka, gii deavdá 70 jagi, lea olles áiggi doaimmas oktavuođas bargan sakka sámi álbmoga ja sámi servodaga ovddas. Das mii leat hui giitevaččat. Danne lea munnje illu, go beasan buot sámiid ovddas geiget váimmolaš lihkusávaldagaid gonagassii, dadjá Sámeidkki presideanta Aili Keskitalo.
G.M. Gonagas Harald V deattuhii sáhkavuorustis ođđa sámedikki rahpamis 1997s, ahte gonagasriika Norga lea ásahuvvon guovtti álbmoga eatnamiidda – sápmelaččaid ja norgalaččaid. Seamma sáhkavuorus šállošii gonagas maiddái dan eahperievtti maid sámit leat gártan gillát guhkes ja garra dáruiduhttinprosessa čađa.
- Sámiide lei dat illubeaivi ja soabahanbeaivi. Muhto sihke ovdal ja maŋŋá dan leat mii oaidnán go G.M. Gonagas Harald V, ja olles Norgga gonagasbearaš, leat bargan Sámedikki ja sámi álbmoga ávkin. Danne mii searvat čiekŋalis giitevašvuođain ja stuorra iluin gonagasa riegádanbeaivvi ávvudeapmái otne, dadjá Keskitalo.