Sámedikki dievasčoahkkijođiheaddji, Josef Vedhugnes, ii loga duohtan dan maid NRK Sámi radio čuoččuha Ođđasiin maŋŋebárgga guovvamánu 20. b. ahte bealli Sámedikki áirasiin dieđihit ahte eai boađde čoahkkimiidda.
Jávkan dievasčoahkkimiin dán válgaáigodagas lea 14%, mii mearkkaša 6 permišuvnna gaskamearálaččat 43 áriasa gaskkas. Buohkaid ovddas geat leat ožžon permišuvnna boahtá dábálaččat várrelahttu, ja dan geažil leat dušše hárve guoros stuolut dievasčoahkkimiin.
- NRK čuoččuha maiddái ahte dáid jávkamiid sivvan livčče áirasiid duhtameahttunvuohta bálkkáiguin. Oktage áirras ii leat ohcan permišuvnna dan geažil go lea duhtameahttun bálkkáin, ja midjiide maid eai leat boahtán garrra signálat das ahte bálká livččii hehttehussan. Buohkat geat leat ožžon permišuvnna leat ožžon dan dohkálaš sivaid vuođul, deattuha Vedhugnes.
Dievasčoahkkinjođiheaddji Vedhugnes reagere maiddái daid boasttudieđuide jávkama ja bálkká birramat buohtastahttojuvvojit vástesaš dieđuiguin Sámedikkis Suoma bealde, gos jávkan NRK mielde lea birrasii 30 proseantta. Vedhugnes deattuha ahte son ii leat duhtavaš go jávkan lea 14 proseantta, ja áiggošii unnidit jávkama
- Muhto čuoččuhusat ahte bealli áirasiin jávká, lea njulgestaga gielis. Konklušuvdna lea duođai nu ahte Sámedikkis Norgga bealde lea mealgat unnit jávkan go Sámedikkis Suoma bealde. Juste nuppeláhkai go NRK čuoččuhus, dadjá Vedhugnes.