PRD: -Else Laula Renberga dáisttačála
Sámi parlamentáralaš ráđi Norgga beale sáttagoddi háliida váikkuhit dasa ahte Else Laula Renberga máinnalmas dáisttačállaga, ”Inför Lif eller Död?”, teavsttat mat almmuhuvvojedje 1904:s, jorgaluvvojit sámegillii, vai su politihkalaš bargu oahpásmahttojuvvošii sámi almmolašvuhtii.
Almmuhan
Kuhmunen, John-Marcus.
Maŋumustá rievdaduvvon 16.03.2007
- Elsa Laula Renberg áŋgirušai olles eallinagis sámi vuoigatvuođaiguin. Son lea okta dain stuorámus jođiheaddjiin mii mis goassege lea leamaš – jus ii leačča dat buot stuorámus, go geahččá su dalááiggi ektui. Min mielas lea deaŧalaš oažžut ovdan ahte su bargu lei eanet go dan ahte son dat fuobmái ja duohtandagai vuosttaš sámi riikkačoahkkima, mii lea sivvan go mii ávvudit sámi álbmotbeaivvi guovvamánu 6. beaivvi. Su čállagat leat ain áigeguovdilat dannego dat gieđahallet vuođđoeavttuid sápmelaččaid ceavzimii álbmogin, dadjá Aili Keskitalo, Sámi parlamentáralaš ráđi presideanta.
Keskitalo aiddostahttá ahte dál ovddiduvvo sámi ovttasbargu rájáid badjel ja ahte sámi dásseárvu lea okta máŋgga ovttasbargosuorggis. Earret eará lágiduvvo Oslos cuoŋománu 19.-20. b. oktasaš sámi konferánsa SÁMIS ”Makt og avmakt i kjønnsperspektiv”, mas sohkabeale dásseárvu sámi perspektiivvas lea váldofáddán.