Almmuhan
Kuhmunen, John-Marcus.
Maŋumustá rievdaduvvon 21.03.2007
- Mu mielas lea čielggas ahte konsultašuvdnašiehtadus lea rihkkojuvvon dán áššis. Konsultašuvnnat galget dáhpáhuvvat buriin áigumušain, juoga maid mun ii oainne leat dáhpáhuvvan go stáhtaráđđi ovddida dieđáhusa almmá doalakeahttá iežas protokollerejuvvon lohpádusa ahte ráhkadit notáhta mas čilgejuvvo mo struktuvradoaibmabijut sáhttet váikkuhit sámi beroštusaid álbmotrievttálaš geatnegasvuođaid ektui. Dát čilgehus galggai leat vuođđun ođđa konsultašuvdnačoahkkimii mii ii dollojuvvon goassege, dadjá Keskitalo.
Danne addá Ráđđehus boasttu dieđuid Stuorradiggái. Stuorradiggedieđáhus ii atte rivttes dieđuid konsultašuvnnas, ii proseassa ii ge posišuvnna dáfus.
Sámediggi vuhtiiváldá ahte ráđđehus ferte dahkat mearrádusa ja ahte konsultašuvdnašiehtadus galgá váikkuhit dasa ahte mearrádusat ollašuhttet stáhta álbmotrievttálaš geatnegasvuođaid. Dakkár duohta konsultašuvnnat galget čađahuvvot, maid ulbmil lea geahččalit juksat ovttamielalašvuođa Sámedikki ja ráđđehusa gaskkas dákkár doaibmabijuid oktavuođas.
- Dán áššis botkejuvvui proseassa fáhkka almmá mange ovddalgihtii dieđiheami haga, áibbas nuppeláhkai go dan maid mii leimmet soahpan. Mun lean fuolastuvvan ja hirpmástuvvan dan geažil mii lea dáhpáhuvvan ássis, in ge heaitte sávvamis ahte dát ii leat dat vuohki mainna ráđđehus áigu doalahit gaskavuođas Sámedikkiin, loahpaha Keskitalo.