- Eanadoallit davvin leat vuoittahallan maŋimus jagiid bálkáovdáneamis. Eahpesihkarvuohta EUa ja WTOa gáibádusaid váikkuhusaid ja heajos gánnáhahttivuođa geažil lea dagahan ahte doaibmavisttiid ođasmahttin lea bisánan. Dát mielddibuktá ahte lea šaddagoahtán hui váttis fidnet ođđa bargiid Davvi-Norgga eanadollui. Dán ovdáneami ferte máhcahit, ja dan mun jáhkán ráđđehusa áddet, lohká Tretnes.
Ráđđelahttu Terje Tretnes galgá njukčamánu 29. b. deaivvadit stáhtačálliin Ola T. Heggem:in ja ságaškuššat boahttevaš eanadoallošiehtadallamiid sisdoalu. Čoahkkims áigu Tretnes válddahallat sámi eanadoalu hástalusaid ja ovddidit konkrehta doaibmabidjoevttohusaid mo sáhtášii buoridit davviguovlluid eanadoalu eavttuid ja gánnáhahttivuođa. Tretnes jáhkká ahte eanadoalus ain sáhttet leat deaŧalaš bargosajit sámi guovlluin. Sámediggeráđis leat ovdal leamaš čoahkkimat davi riikkaoasi eanadoalloorganisašuvnnaiguin.
- Dál lea áigi earuhit daid doaibmabijuid ja ortnegiid, mat galget guoskat guovddáš guovlluide ja riikka davviguovlluide. Leat nu stuorra erehusat eanadoalus davvin ja máddin dálkkádaga, šaddama ja ekonomiija dáfus, ahte doaibmabijuid ferte buorebut heivehit iešguđet guovlluide, oaivvilda Tretnes.