Maiddái sámi resursajoavku lea váikkuhan dasa, ja sii ánssášit giittu áŋgiruššama ovddas dán áigodagas. Dat maid duhtadahttá go dat eará ohccigávpogat dorjot válljejuvvon evttohasa. Keskitalo vuordá dál ahte ohccisearvi Tromsø 2018 AS vuođđuda viidáset proseassa maiddá sámi servodahkii.
- Sámit ja Árktisa eará eamiálbmogat dárbbašti dan riikkaidgaskasaš fuomášumii maid OG Romssas vejolaččat mielddisbuktá. Ja áinnas go jurddaša daid dálkkádathástalusaid birra maid mii Árktisas fertet dustet ja mat čuhcet garrasepmosit eamiálbmogiidda. Danne áigu Sámediggi váikkuhit dasa ahte eamiálbmotberoštumit fuolahuvvojit viidáset proseassas 2010 rádjai, dadjá Sámedikki presideanta Aili Keskitalo.
Formálalaš OG-ohcan dárbbaša stáhtadáhkádusa, ja danne galgá ráđđehus árvvoštallat sihke ohcama ja árvalusa. Dasto galgá ohcan hábmejuvvot ja sáddejuvvot riikkaidgaskasaš olympialávdegoddái, IOC:ii, ovdal 2010. Jus Norga ja Romsa galget lágidit 2018 OGa, de šaddá dat vuosttaš gearddi go olympiagilvvut lágiduvvojit davábealde poláragierddu, ja Árktisa eamiálbmogiid ruovtturiikkas.
- Dan perspektiivvas lea lunddolaš bovdet Árktisa eará eamiálbmogiid searvat kulturprográmmii, ja juohkit lávddi singuin. Sámiid bealis galgá ohcan konkretiserejuvvot, ja sihke návccaid ja gelbbolašvuođa ferte sihkkarastit. Ohcansearvvi organiserema berre maiddái nannet sámi oassálastimiin, sihke stivrras ja hálddahusas, dadjá Keskitalo.