Sámedikki sámediggeválggaid fágalávdegoddi evttoha unnidit válgabiirelogu beliin, 13 válgabiirres 7 válgabiirii 2009 sámediggeválggain. Lávdegoddi evttoha seammás rievdademiid mat addet jienasteddjiide buoret váikkuhanvejolašvuođa personválggain.
- Lávdegoddi evttoha stuora rievdadusaid muhtun osiide Sámedikki válgaortnegis. Mii oaivvildit ahte rievdadusat ovddastit dárbbašlaš ođasmahttimiid Sámedikki válgaortnegii, ja dat dagaha ahte válggat šaddet eanet ovddasteaddjin ja einnostahttin. Min evttohusat mielddisetbuktet ahte jienastuslogu sturrodat ja iešguđet biirriid áirraslohku soahpá buoret oktii, dadjá proffesor ja lávdegotti jođiheaddji Per Selle.
Lávdegoddi evttoha unnidit válgabiirelogu 13 válgabiires 7 válgabiirii. Seammás evttoha lávdegoddi ahte ollislaš áirraslohku unnu 43 áirasis 39 áirasii. Juohke válgabiire oažžu guokte fásta mandáhta, ja mandáhttasajit mat báhcet, juhkkojuvvojit gorálaččat juohke válgabiirre jienastuslogu mielde ovddit válggain.
Lávdegotti evttohusa mielde galget buot suohkanat gos leat eambbo go 30 olbmo registrerejuvvon Sámedikki jienastuslohkui, lohkat ja elektruvnnalaččat raporteret válgabohtosiid almmolaš válgaidjavuogádagas. Dat eavttut mielddisetbuktet ahte 90 % jienain lohkkojuvvojit ja almmuhuvvojit válgaija. Jienasteaddjit eará suohkaniin (gos leat unnit go 30 olbmo jienastuslogus) sáhttet dušše jienastit ovddalgihtii.
- Min evttohus mii guoská válgabiirriide ja mandáhttajuohkimii, lea oktasaš ja ollislaš evttohus. Evttohus válgaloahppameanuid birra mielddisbuktá ahte válgabohtosat leat gárvásat ja almmolaččat válgaija. Mii oaivvildit ahte lávdegotti evttohus nanne jienasteddjiid rivttiid ja buorida válggaid rievttalašvuođa ja guorraseami, dadjá Selle.
Fágalávdegoddi evttoha rievdadit doahpaga "sámi jienastuslohku" doahpagii "Sámedikki jienastuslohku" sámelágas ja láhkaásahusain. Lávdegoddi deattuha mearkkašumi bealálaš eavttus "atnit iežas sápmelažžan" jienastuslogu dieđiheamis. Muđui evttoha lávdegoddi ahte doaba "ruovttugiella" njulgejuvvo dáinna lágiin; "giella mii bajásšaddamia vuolde hubmojuvvui ruovttus".
Sámedikki fágalávdegoddi sámediggeválggaid čielggadeapmái, ásahuvvui Sámediggeráđi bokte čakčamánu 30. b. 2006 čađahandihte olles válgaortnega Sámediggeválggaid oktavuođas. Lávdegoddi ávžžuhuvvui earenoamážit árvvoštallat válgabiirriid rievdadeami ja mandáhttajuohkima daid gaskkas. Lávdegottis ledje mielde; professor Per Selle (lávdegotti jođiheaddi), dutki Torunn Pettersen, professor Bjørn Erik Rasch, dutki Eva Josefsen ja professor Nils Oskal.