Raporttas evttohuvvo ahte sámelága rievdademiin galgá Sámediggi šaddat formálalaččat eanet iehčanassan ráđđehusa ektui go ovdal lea leamaš. Evttohus mearkkaša dálá dili formaliseren. Muđui evttohuvvo ásahit bušeahttavugiid mo mearridit jahkásaš bajimus ekonomiijarámmaid Sámediggái ja sámi áigumušaide muđui.
Bargo- ja searvadahttinministtar ja sámediggepresideanta leaba ovttas ásahan bargojoavkku. Vuođđun dán bargui leat álbmotrievtti geatnegasvuođat ja háliidus nannet sámi servodaga demokratiija proseassaid. Muđui lea leamaš ulbmilin nannet ráđđehusa ja Sámedikki gaskasaš ovttasdoaibmama ja beavttálmahttit ráđđehusa barggu sámi áššiiguin. Bargojoavkkus leat leamaš lahtut Sámedikkis, Justiisa- ja politiijadepartemeanttas ja Bargo- ja searvadahttindepartemeanttas.
Ráđđehus ja Sámediggi áigot čađahit konsultašuvnnaid gaskaneaset daid doaibmabijuid birra, mat evttohuvvojit rapportas, ja ášši digaštallojuvvo stuoradiggedieđáhusas sámepolitihka birra mii almmuhuvvo 2007 čavčča.
Sámediggi áigu meannudit ášši čakčamánu dievasčoahkkimis.