-Valáštallit leaba goabbat ládje positiivvalaččat ovddastan valáštallama ja leaba oláhan buriid bohtosiid vaikko ain leaba nuorat. Bálkkašumiin sávvat veahkehit goappašagaid joatkit sudno čuvges valáštallankarriearain, dadjá Sámediggeráđđelahttu Terje Tretnes.
Oda Utsi Onstad ovddasta Fagernes IL ja son lea oláhan buriid bohtosiid sihke sprintviehkamis ja guhkkodatnjuikemis. Son lea norgga buoremusaid searvvis bođuvaláštallamis ja oassálastá norgga sprintriikajoavkkus. Dasa lassin lea sus norggaoláhus 60 m viehkamis 17 jahkásaččaide ja lea vuoitán golle ja silbamedaljjaid norggameaštirgilvvuin.
Siv Anja Mienna ovddasta searvvi Mudo Team Heimdal. 16 jahkásažžan šattai son davviriikkaidmeaštir gilvalansuorggis Taekwondo, ja son lea dál norgga riikajoavkkus. Son lea vuoitán norggameaštirgilvvuid, vuoitán máŋga našunála gilvvuid Norggas ja maiddái vuoitán stuora gilvvu Københámmanis. Mienna lea dál oassi norgga seniorriikajoavkkus ja sus lea mihttomearri beassat oassálastit olympiijagilvvuin Londonis 2012.
-Oda Utsi Onstad ja Siv Anja Mienna leaba erenoamáš buorit ovdagovat sámi nuoraide ja danin soai leaba positiivvalaš rollamodeallat ja ambasadevrrat sámi nuoraide, dadjá Tretnes.