Stuorradiggi mearridii duorastaga ođasmahttojuvvon boazodoallolága. Sámediggeráđđi oaivvilda ahte láhkarievdadus lea gustovaš lága buorideapmi, muhto lea beahttašuvvan go ILO-konvenšuvdna nr 169 ja evttohus bidjat 200 ealli vuođđovuoládussan eai leat heivehuvvon.
Gulahallamis ealáhuslávdegottiin lea Sámediggeráđđái leamaš deaŧalaš oažžut mearrádusa ahte boazodoalloláhka galgá gustot daiguin ráddjejumiiguin mat čuvvot ILO-konvenšuvnna, ja ahte vuođđovuoládussan galget leat 200 ealli vai suodjala daid siiddaid main leat unnánot bohccot boazologu geahpedeami oktavuođas. Dainna suodjaluvvošedje nuorat álggahanmuttus.
- Mun lea dattetge duhtavaš go Stuorradikki ealáhuslávdegoddi eaktuda ahte Sámi vuoigat¬vuođalávdegoddi 2 galgá eanet árvvoštallat guovddáš riektegažaldagaid. Čakčat gárvána Sámi vuoigatvuođalávdegotti evttohus, ja mun vuorddán ahte ráđđehus johtilit álggaha barggu ođđa ja ollislaš boazodoallolágain, dadjá Sámedikki presideanta Aili Keskitalo.
- Stuorradikki mearrádus addá buori vuolggasaji bargui áibbas ođđa ja ollislaš boazodoallo¬lágain. Mun áiggun deattuhit ahte lága ođasteamis fertet mii sihkkarastit dan ahte boazodoalu stivrenorgánain šaddet boazo¬sámit eanetlohkui, loahpaha Keskitalo.