Nuorat lea okta áŋgiruššama váldoulbmiljoavkkuin. Dainna mii leat hui duhtavaččat go nuorain dál lea vádjitovddastus jienastuslogus. Nu dadjá Sámedikki nuoraidpolitihkalaš lávdegotti (SNPL) jođiheaddji Laila Nystad.
Riikkaviidosaš juohkašupmi
Ávdnasat sáddejuvvojit Finnmárkku, Romssa ja Davit Nordlándda válgabiirre nuorra jienasteaddjiide ja bearrašiidda, ja Lulli-Trøndelága, Nordlándda, Romssa ja Finnmárkku joatkkaskuvllaide. Maiddái buot gielddat ja fylkkagielddat ožžot diehtojuohkinávdnasiid.
Eavttut
Okta eavttuin beassat čálihit iežas sámi jienastuslohkui lea ahte uhcimusat okta du máttaráhkuin/-ádjáin lei sámegielat. Ollu nuorat eai ollašuhte dán gáibádusa, erenoamážit guovlluin olggobealde Sis-Finnmárkku. Sii besset čálihit iežaset sámi jienastuslohkui jus nubbi sin váhnemiin lea čálihan iežas dohko.
Čálihanáigemearri beassat jienastit dán válggas lea miessemánu 31. b. 2005.
Váhnemiin lea ovddasvástádus
- Jus rávesolbmot dál eai váldde ovddasvástádusa ja čálihit iežaset sámi jienastuslohkui, de sii maid bilidit boahtte buolvvaid vejolašvuođaid dan dahkamis, loahpaha Nystad.