Sámediggi mearridii njuolggadusaid miessemánu 27 b. 2004 Sámedikki dábálaš mearridanválddi vuođul, ja geassemánu 12. b. 1987 mannosaš lága nr. 56 vuođul Sámedikki ja eará sámi riektediliid birra (sámeláhka) § 1-6 nubbi teakstaoassi.
§ 1 Sámiin Norggas, Ruoŧas, Suomas ja Ruoššas lea oktasaš leavga, mii dainna lágiin lea olles sámi álbmoga oktasaš álbmotsymbola.
§ 2 Norgga beale Sámediggi mearrida dáinna láhkaásahusain geatnegahtti njuolggadusaid das mo sámi leavga galgá geavhuvvot Norgga stáhta eatnamiin.
§ 3 Sámi leavgga geavaheapmi galgá dávistit dan árvvusatnima, maid juohke álbmotsymbola geavaheapmi ánssáša.
§ 4 Sámi leavga galgá geavahuvvot mearriduvvon sámi leavgabeivviid ja almmolaš sámi dilálašvuođain ja čalmmustemiin. Leavgga sáhttá geavahit earáge sámi álbmoga allaáiggálaš ja avvudemiid dilálašvuođain.
Sámi leavgabeaivvit leat
· guovvamánu 6. b. (Sámi álbmotbeaivi)
· njukčamánu 25. b. (Márjjabeaivi – Márjjá ávaštusbeaivi. Árbevirolaš sámi mearkabeaivi)
· geassemánu 24. b. (Mihcamarbeaivi. Árbevirolaš sámi mearkabeaivi)
· borgemánu 9. b. (Ovttastuvvan našuvnnaid álgoálbmotbeaivi)
· borgemánu 15. b. (Sámi leavgga dohkkehanbeaivi – borgemánu 15. b. 1986)
· borgemánu 18. b. (Sámiráđi vuođđudanbeaivi - borgemánu 18. b. 1956)
· borgemánu 26. b. (Ruoŧa beale Sámedikki vuođđudanbeaivi - borgemánu 26. b. 1993)
· golggotmánu 9. b. (Ruoŧa beale Sámedikki vuođđudanbeaivi – golggotmánu 9. b. 1989)
· skábmamánu 9. b. (Sámi parlameantta vuođđudanbeaivi – skábmamánu 9. b. 1973)
Leavgga sáhttá maid geavahit virggálaš norgalaš leavgabeivviid, virggálaš norgalaš dilálašvuođain, norgalaš álbmoga allaáiggálaš ja ávvudemiid dilálašvuođain, ja maiddái go iešguđet deasttaid geažil lea erenoamáš deaŧalaš dahje sávahahtti.
Sámi leavgga sáhttá maid geavahit priváhta ávvudemiid oktavuođas.
§ 5 Sámi leavgga sáhttá geavahit okto dahje ovttas norgalaš stáhtaleavggain, norgalaš gávpeleavggain, eará našuvnnaid leavggaiguin ja earalágan leavggaiguin.
§ 6 Go sámi leavga geavahuvvo virggálaš norgalaš leavgabeivviid ja virggálaš norgalaš dilálašvuođain, de galgá sámi leavga leat olgešbealde norgalaš leavgga. Go sámi leavga geavahuvvo ovttas norgalaš leavggain sámi leavgabeivviid ja sámi dilálašvuođain, de galget leavggat biddjot nu mo vuosttas teakstaoassi dadjá.
§ 7 Áigodagas njukčamánnu - golggotmánnu gessojuvvo leavga dii. 08.00 ja luitojuvvo go beaivi luoitáda, muhto ii dattetge maŋŋá dii. 21.00. Áigodagas skábmamánnu - guovvamánnu gessojuvvo leavga dii. 10.00 ja luitojuvvo dii. 15.00. Guovlluin máttabealde Nordlándda fylkka gessojuvvo leavga dii. 09.00 áigodagas njukčamánnu - golggotmánnu ja luitojuvvo go beaivi luoitáda, muhto ii dattetge maŋŋá dii. 21.00.
§ 8 Sámediggi sáhttá erenoamáš dilálašvuođain suovvat sámi leavgga geavahit earaláhkai go dan mii dáin njuolggadusain čuožžu.
§ 9 Go lea eahpádus sámi leavgga geavaheami birra almmolaš visttiin, de galgá váldit oktavuođa Sámedikkiin.
§ 10 Dát láhkaásahus biddjo fápmui dalán.