Liikká lea sámi kultuvra dál ealli ja máŋggabealat ja lea ovdáneamen. Kultuvra albmana giela, ealáhusaid, dáidaga, musihka, biktasiid, duoji, diktema ja girjjálašvuođa bokte.
Ráđđehusa sámepolitihka ulbmilii gullá earret eará „láhčit vejolašvuođaid nu ahte sámi álbmot sáhttá nannet ja ovddidit (...) kultuvrras.“ Stáhtas lea dát ovddasvástádus Vuođđolága olis ja ILO-soahpamuša olis eamiálbmogiid vuoigatvuođaid hárrái.
Oassi dán ovddasvástádusas lea biddjojuvvon Sámediggái mii galgá earret eará Sámi kulturfoandda bokte ovddidit sámi kultuvrra ja doaibmabijuid sámi mánáid ja nuoraid várás, ja váikkuhit sámi kulturdoaimmaid sámi álbmoga várás.
Sámediggái lea maid biddjojuvvon ovddasvástádus hálddašit sámi kulturmuittuid. Dás leat namuhuvvon muhtun ovdamearkkat mat čájehit mo Sámediggi bargá ovddidit sámi kultuvrra:
- áhčá vejolašvuođaid sámegiel oahpahussii ja addá doarjaga sámi oahpponeavvuid ráhkadeapmái
- addá doarjaga girje-, filbma- ja CD-prošeavttaide
- addá doarjaga sámi girjebussiide ja doaimmaha Sámi sierrabibliotehka
- doarju politihkalaččat árbevirolaš sámi ealáhusaid nugo boazodoalu, vuotnaguolástusa ja meahcceealáhusaid
- láhčá vejolašvuođaid joatkkaoahpahussii omd. boazodoallofágas ja duojis
- addá doarjaga duoji viidásetovddideapmái
- addá doarjaga sámi lágadusaide ja servviide
- juohká stipeanddaid sámi dáiddáriidda ja čálliide
Gáldut / Eanet dieđut
Solbakk, John T. 2004. ”Samene- en håndbok”. Kárášjohka: Davvi Girji.
Sámediggi. 2005. ”Sámedikki jahkedieđáhus 2004”- Kárášjohka: Sámediggi.