Máhttolokten lea vuođđoskuvlla ja joatkkaoahpahusa ođđa ođastus. Ođastus rievdadahttá ollu skuvlla sisdoalu, struktuvrra ja organiserema vuođđoskuvlla vuosttaš ceahki rájes joatkkaoahpahusa maŋimuš ceahki rádjai.
Leat ráhkaduvvon sierra sámi oahppoplánaid. Dát oahppoplánat leat seammaárvvoasaččat ja paralleallat sámi guovlluin ja sámi ohppiide olggobealde sámi guovlluid geat ožžot sámi oahpahusa. Fágaide maidda eai leat mearriduvvon sámi parallealla plánat, gustojit mearriduvvon našonála oahppoplánat.
Ođastus álggaheapmi
Ođastus álggahuvvo borgemánus 2006 vuođđoskuvlla 1. – 9. ceahki ja joatkkaskuvlla vuosttaš ceahki ohppiide. Skuvlajagi 2007/2008 rájes guoskagoahtá ođastus vuođđoskuvlla buot 10 ceahkkái, ja dasto joatkkaskuvllaid vuosttaš ja nuppi vuođđodássái, nu gohčoduvvon Jo1 ja Jo2. Skuvlajagi 2008/2009 rájes váldojuvvo Máhttolokten ollásit vuođđoskuvlaoahpahussii, nu ahte buot 10 ceahki vuođđoskuvllas ja buot 3 ceahki joatkkaoahpahusas gullet dasa.
Sámi máhttolokten
Ráhkaduvvo sierra sámi oahppoplána Sámi Máhttoloktemii. Eanaš oahppoplánat mat galget dán oahppoplánačoakkáldahkii leat juo mearriduvvon. Vuođđoskuvlafágaide ja dábálaš fágaide vuođđo- ja joatkkaoahpahusas nugo fágaide luonddufága, servodatfága, musihkka, biebmu ja dearvvašvuohta, risttalašvuohta-, osku ja eallinoainnumáhttu, dárogiella ohppiide geain lea sámegiella vuosttašgiellan ja duodji (paralleallaplána kunst og håndverk) leat ráhkaduvvon ja mearriduvvon sámi parallealla plánat. Fágaide maidda eai leat mearriduvvon sámi parallella plánat, gustojit mearriduvvon našonála oahppoplánat.
Ohppiide geain lea oahpahus sámegielas lea maiddái mearriduvvon sierra fága- ja diibmojuohku. Dát guoská buot ohppiide Norggas geat válljejit sámegiela vuosttaš- dahje nubbingiellan.
Oahpahus sámi guovlluin
Ohppiin sámi guovllus galgá leat oahpahus Máhttoloktema – Sámi Oahppoplánabuktosa ektui. Sámi guovlun oaivvilduvvojit čuovvovaš gielddat: Guovdageaidnu, Kárášjohka, Porsáŋgu, Deatnu, Unjárga, Gáivuotna ja Divtasvuodna. Sámi guovlu lea čilgejuvvon oahpahuslágas.
Oahpahus sámi guovlluid olggobealde
1) Oahppit geat ožžot oahpahusa sámegielas ja sámegillii
Oahppit geat ožžot oahpahusa sámegillii sámi guovlluid olggobealde, galget oažžut oahpahusa Máhttoloktema sámi oahppoplánaid vuođul. Go uhcimusat 10 oahppi gáibidit oahpahusa sámegillii dakkár gielddas mii lea sámi guovlluid olggobealde, de sis lea vuoigatvuohta oažžut dan fálaldaga nu guhká go ain leat guhtta oahppi joavkkus.
2) Oahppit geat ožžot oahpahusa sámegielas
Oahppit geat ožžot oahpahusa sámegielas vuosttašgiellan dahje sámegielas nubbingiellan, muhto eai oaččo oahpahusa sámegillii eará fágain, galget oažžut oahpahusa sámegiel- ja dárogielfágas Máhttoloktema sámi oahppoplánaid vuođul, muhto oahpahus eará fágain galgá addojuvvot Máhttoloktema oahppoplánaid vuođul.
Prinsihppaoassi ja oahppoplánat galget leat válbmasat 2007/2008 skuvlajagi álgui.
Sámi Oahppoplánabuktosii gullet
Oahppoplánabuktosis leat:
• Oppalaš oassi
• Oahpahusa prinsihpat
• Fága ja diibmojuohku
• Sámi oahppoplána - Sámegiella vuosttašgiellan
• Sámi oahppoplána - Sámegiella nubbingiellan
• Sámi oahppoplána - Sámegiela čiekŋudeapmi
• Sámi oahppoplána - Duodji
• Sámi oahppoplána - Musihkka
• Sámi oahppoplána - Biebmu ja dearvvašvuohta
• Sámi oahppoplána - Risttalašvuođa-, oskku- ja eallinoainnumáhttu
• Sámi oahppoplána - Luonddufága
• Sámi oahppoplána - Servodatfága
• Sámi oahppoplána - Historjá
• Sámi oahppoplána - Geografiija
• Sámi oahppoplána - Religiovdna ja etihkka
• Sámi oahppoplána - Dárogiella ohppiide geain lea sámegiella vuosttašgiellan
Fágain main ii leat ráhkadan sámi parallellaš oahppoplánaid, gustojuvvojit našunála mearriduvvon oahppoplánat:
• Oahppoplána - Dárogiella
• Oahppoplána - Dárogiela čiekŋudeapmi
• Oahppoplána - Dárogiella bealjjehemiide ja lossaguluhidda
• Oahppoplána - Dárogiella mearkagiella
• Oahppoplána - Matematihkka
• Oahppoplána - Eŋgelasgiella
• Oahppoplána - Eŋgelasgiela čiekŋudeapmi
• Oahppoplána - Eŋgelasgiella bealjjehemiide ja lossaguluhidda
• Oahppoplána - Vierisgiella
• Oahppoplána - Suomagiella nubbingiellan
• Oahppoplána - Lášmohallan
• Oahppoplána - Drama ja rytmihkka bealjjehemiide ja lossaguluhidda
• Ohppiidráđibargu
Prinsihpaoassi ja oahppoplánat galget válbmasat 2007/2008 skuvlaálgimii.