Sámedikki presideanta Egil Olli, Brasilia, čakčamánu 16. b. 2008.
Stáhtaministtarat,eksleleanttat,ráhkis olbmot, ráhkis eamiálbmot vieljat ja oappát
Sámiide lea máŋggaid jagiid leamaš stuorra ávki ja leat ožžon inspirašuvnna eamiálbmogiid gaskasaš riikkaidgaskasaš ovttasbargui searvamis. Dán ovttasbargui lea maiddái Sámediggi searvan dan rájes go dat ásahuvvui 1989:s, erenoamážit áigeguovdilis ON-orgánaid siskkobealde. Dat lea dat lagaš ovttasbargu eamiálbmogiid gaskka ja eamiálbmogiid ja siviliserejuvvon álbmoga gaskka alla olmmošvuoigatvuođastandárddaiguin mii lea váikkuhan eamiálbmogiid vuoigatvuođaid ovddideami nugo dat bohtet ovdan ILO-konvenšuvnnas nr 169 eamiálbmogiid ja čearddalaš álbmogiid hárrái iešmearrideaddji stáhtain ja ON-julggaštusas eamiálbmogiid vuoigatvuođaid hárrái maid ON váldočoahkkin mearridii čakčamánus 2007.
Min iežamet rahčamušaid oktavuođas oažžut stuorát rievttalašvuođa ja vuoigatvuođaid daid guovlluide gos mii leat ássan ovdahistorjjálaš áiggi rájes, ja vuoigatvuođa ovdáneami oktavuođas iežamet eavttuid mielde, leat mii oaidnán ahte dárbbašuvvo máhtolašvuohta. Erenoamážit leat mii oaidnán ahte min álbmot oahpu bokte lea háhkan máhtolašvuođa daid kultuvrraid ja normatiiva ja rievttálaš standárddaid birra mat gusket min eallinvuohkái ja kultuvrii. Erenoamážit oahpu ja máhtolašvuođa bokte leat mii oahppan movt mii galgat gaskkustit máhtolašvuođa ja háhkat áddejumi min iežamet kultuvrra, min iežamet árbevieruid birra ja movt galgat hábmet iežamet rievttalašvuođa gáibádusaid. Dán vuođul háliidan mun sávvat ollu lihku seminárain eamiálbmogiid ja alit oahpu birra mii galgá lágiduvvot eamiálbmotprográmma 25-jagi čalmmusteami oktavuođas.
Mii diehtit ahte leat viehka stuorra erohusat daid áššečuolmmaid gaskka mat mis sámiin leat daid váttisvuođaid ektui maiguin máŋga Brasilia eamiálbmoga fertejit dáistalit. Danne leat mii duhtavaččat go beassat leat mielde go Norgga ráđđehus čuovvola julggaštuvvon mihttomeriid dan ektui ahte doarjut eamiálbmogiid ja suodjalit eamiálbmogiid eatnamiid resurssaid ala bahkkemis ja billisteames eamiálbmogiid eallinguovlluid. Mis lea áigumuššan váikkuhit Norgga eiseválddiid dan ektui ahte ain ja nannoseappot bargat ávkin eamiálbmogiidda, buoremusat ávkin lundui ja dálkkádatoadjebas resursageavaheapmái.
Loahpas háliidan sávvat lihku viidáset ovttasbargui Brasilia ja Norgga gaskka buoremusat ávkin buot máilmmi eamiálbmogiidda.
Giittán beroštumis!