Stáhtabušeahtas evttohuvvo buohkanassii 3,6 % sturrosaš lassáneapmi sámi ulbmiliidda, dan ektui go stáhtabušeahtas lea buohkanassii 10 % lassáneapmi. Maŋimus 12 mánu 4,5 % sturrosaš haddelassáneapmi mearkkaša ahte 2009 bušeahtta sámi ulbmiliid várás duohtavuođas lea heajut go 2008 bušeahtta. Bušeahtas Sámediggái lea buohkanassii 7,4 % lassáneapmi, mii mearkkaša ahte sámediggebušeahta duohtalassáneapmi lea ráddejuvvon.
- Lean hirpmástuvvan go ráđđehus bušeahttaevttohusastis ii láže dilálašvuođaid sámi servodatovdáneami nannemii. Ii dárbbaš oppa eahpidit ge ahte ollu suorggiid, nugo giela, museaid ja oahpponeavvuid, dárbbaša nannet mealgat. Dađibahábut mun gávnnahan ahte ráđđehus ii veahket min olus vuoruhit dáid surggiid boahttejagi sámediggebušeahtas, dadjá Olli.
- Vaikko ráđđehus muhtun surggiin evttoha lassáneami, de ii leat das olus ávki dannego ollislaš rámmat eai nannejuvvo. Sámediggi galgá ja ferte váldit ollislaš bušeahttaovddasvástádusa. Danne ii leat nu illudahtti go ráđđehus evttoha lassánemiid muhtun ovttaskas surggiin, go dat duohtavuođas mearkkaša gáržžidemiid eará sajiin, dadjá Egil Olli.
- Ráđđehusa uhca bušeahttalassáneamáš sámi ulbmiliidda čájeha áibbas čielgasit ahte lea dárbu ásahahttit álbmotrievtti vuođul dohkálaš bušeahttameannudanvugiid ráđđehusa ja Sámedikki gaskka, loahpaha Sámedikki presideanta Egil Olli.