- Mu mielas lea hui dehálaš galledit giellaguovddážiid vai beasan oažžut njuolga dieđuid makkár giellabarggut leat jođus ollu sámi báikegottiin, erenoamážit go guoská guovlluide olggobealde sámegiela hálddašanguovllu, dadjá várrepresideanta Marianne Balto.
Várrepresideanttas lea čoahkkin maiddái Loabága suohkaniin (ovdagottiin ja Gielddalaš sámegiela áššiid ráđđeaddi orgána lahtuiguin) dili birra Loabága suohkanis ja dan laktimis sámegiela hálddašanguvlui. Dasto lea áigumuššan ságastallat Loabága sámi giellaguovddáža, sámegiela doaibmaplána ja árvoháhkanprográmma birra.
- Mu mielas lea buorre ságastallat Loabága suohkaniin daid hástalusaid ja vejolašvuođaid birra mat mis leat sámegiela ja servodatovddideami nannenbarggus doppe, dadjá várrepresideanta Marianne Balto loahpas.