Presideanta oaivvilda ahte lea dárbu eanet almmolašvuhtii Sámedikki politihkalaš doaimma birra, ja dainna lágiin nannet sámi demokratiija.
- Ráđđi váldá maiddái vuhtii Sámedikki dievasčoahkkima ávžžuhusaid eanet rabasvuođa birra duođas ja virgáibidjá bargovehkii olbmo mas lea earenoamáš ovddasvástádus juste dan suorggis. Ođđa politihkalaš ráđđeaddi galgá doaibmat ráđi preassaovddasvástideaddjin ja nannet oktavuođa gaskal ráđi ja media, deattuha Olli.
Sámediggepresideanta čujuha maiddái ahte áššehivvodat lea sturron sakka ja oaivvilda ahte ráđđi lea dál gávdnan buori čovdosa go lea válljen olbmo geas lea nanu preassahárjáneapmi ja politihkalaš máhttu. Lassáneaddji áššehivvodagas namuha presideanta eanet politihkalaš konsultašuvnnaid Ráđđehusain, árvoháhkanprográmma čuovvoleami, giela áŋgiruššama, oahpponeavvuid buvttadeami áŋgiruššama, ođđa lágaiguin bargat, riddoguolástanlávdegotti evttohusa čuovvoleami ja Sámi vuoigatvuođalávdegotti II.
- Go nannet politihkalaš bargoveaga de mii sihkkarastit ahte sámi jietna gullo buorebut ja lea eanet oidnosis medias ja sámi álbmoga gaskkas. Buorre dialoga ja kommunikašuvdna lea dárbbašlaš politihkalaš barggus ovddidan dihte sámi servodaga ja sámi demokratiija, dadjá sámediggepresideanta.