Beaivváš Sámi Teáhter lea sámi nationálateáhter
Sámediggeráđi lahttu Vibeke Larsena bokte
Ollu lea leamaš stuibmi dan birra go stuorradiggedieđáhusas lávdedáidaga oktavuođas ii válddahallojuvvo Beaivváš Sámi Teáhter nationálateáhterin. Sámediggi lea jagi 2002 rájes hui guhkás ieš stivren sámi kulturpolitihka. Ráđđehusas lea ovddasvástádus fuolahit das ahte Sámedikkis lea ekonomalaš doaibmavejolašvuohta hábmet ja čađahit sámi kulturpolitihka.
Dalle go Beaivváš Sámi Teáhter ásahuvvui lei vuođđojurddan juste ahte teáhter lea sámiid várás - sámi nationálateáhter!
Danne orru imaš go muhtumat vikkahit nu ahte Sámediggi galgá jearrat Kultur- ja girkodepartemeanttas lobi gohčodit Beaivváš Sámi Teáhtera sámi nationálateáhterin. Aivvefal Sámediggi sáhttá rievdadit teáhtera stáhtusa, ja dat ii leat dahkkojuvvon.
Sámediggi lea duhtavaš go Stuorradiggedieđáhusas nr 32 (2007-2008) 'Bak kulissene' válddahallojuvvo sámi lávdedáidda ja dan mearkkašupmi erenoamážit. Dieđáhusas maid ii leat vuosteháhku ektui go Sámediggi oaivvilda ahte Beaivváš Sámi Teáhter lea sámi nationálateáhter, ja dán teáhterii ferte erenoamážit sihkkarastojuvvot ekonomalaš vuođđu viidáset doibmii ja huksemii. Girko- ja kulturdepartemeanta geatnegahttojuvvo dieđáhusas raporteret Beaivváža doaimmaid birra omd. bušeahttaproposišuvnnain seamma dásis eará nationála lávddiiguin. Dát raporterengeatnegasvuohta ii guoskká máttasámi teáhterii (Åarjelsaemien Teatere/Sydsamisk teater), go dat teáhter ii leat meroštallojuvvon sámi nationálateáhterin.
Beaivvaš Sámi Teáhter lea ja galgá ain leat min sámi nationála lávdi.