Ráđđelahttu Johan Mikkel Sara lea hui duhtavaš go Oslo gielda lea mieđihan Sámedikki ávžžuhussii, ja jáhká ahte dát mielddisbuktá válgaoassálastima lassánit Oslos.
- Ovdun lea ahte dál sáhttá jienastit sihke stuorradiggeválggas ja sámediggeválggas iežas birasguovllu válgalanjas. Ovdal leat sámi jienasteaddjit ferten mátkkoštit oalle guhkás go galge jienastit. Dat lea dagahan ahte válgaoassálastin Oslos lea njiedjan dramáhtalaččat. Dál doaivut ahte dát buorrána, dadjá Sara.
1989 sámediggeválgga oassálastin lei 78 proseantta ja 2001 válggas dat lei njiedjan 56 proseanta. Sivvan dasa lei várra dat go olbmot fertejedje mátkkoštit gitta Oslo Ráđđevissui jienastit sámediggeválggas. 2005 stuorradigge- ja sámediggeválgga jienastanbeaivi lea čakčamánu 12. b.
- Mii leat hui giitevaččat ja duhtavaččat go Oslo gielda lea duođas váldán dán dili ja dál fállá dán bálvalusa sámi jienasteaddjiide, deattuha Sara.