Kulturmuito-teama arkeologat leat dán čavčča čađahan guokte stuorra geahčadanprošeavtta Setermoen báhčinguovllus Bearddus ja Ráisa álbmotmeahcis Ráissas. Goappašat prošeavttat leat álggahuvvon 2007 gieddeáigodagas ja daiguin leat bargan viidáseappot dán jagi.
Forsvarsbygg lea addán registrerenbarggu Setermoenis dan oktavuođas go leat ovddideamen báhčinguovllu. Doppe leat registrerejuvvon 25 árrana. Sámediggi lei maiddái mielde iskkadeamen ođđa vuogi movt gávdnat kulturmuittuid. Norgga kulturmuitodutkama instituhtta (Norsk institutt for kulturminneforskning, NIKU) lea girdiin laserskánnen báhčinguovllu ja čoaggán vejolaš kulturmuittuid. Dán jagi geahčadeamis dahkkojuvvui lokalitehtaid gieddeiskan. Gávdnojedje máŋga báhčinrokki, okta boaldámušrádju, moadde eatnadathámi ja guokte muorragubá. Nugo jáhkiimet de ii heive vuohki nu bures guovlluide gos leat nu viidát lihkahallojuvvon guovlu nugo báhčinguovllus. Lea dattetge čájehan ahte girdiin laserskánnen lea leamaš ávkkálaš eará sajiin.
Registreremiid ulbmilin Ráisa álbmotmeahcis lei kártet kulturmuittuid turistabálgá miehtá Sieimmas Raisjávrái ja guovllus Njállaávžži birrasis. Dán jagi registreremat leat prošeavtta joatka mii álggahuvvui 2007:s, dallego čađahuvvojedje iskkadeamit Raisjávrri birrasis ja dasto eatnadatsuodjalanguovllus oarjjabealde álbmotmeahci. 2008:s registrerejuvvojedje čieža vahku áigodagas sullii 140 kulturmuittu. Daid gaskkas ledje 9 bihkkahávddi, ollu bázahusat cehkkojuvvon barttain ja gođiin, measta 100 árrana, ja dasto máŋga bivdorokki ja čilat. Gávdnosat duođaštit ahte guovlu lea guhkes áiggi ja divdnadit geavahuvvon Ráisavuomis.