Doarjjastivrra jođiheaddji Ann-Mari Thomassen ovdandoallá erenoamážit čuovvovaš juolludemiid:
Buohkanassii 1 050 000 ru juolluduvvui doarjjan 6 fanasinvesteremii ja 255 000 ru oktasaš bruggarusttegii Davit Ittarvuona guolásteaddjiid várás Ivgu suohkanis. Doarjja juolluduvvui maiddái nuorra guolásteaddjiide ja dat čájeha ahte lea buorre rekruteren guolástussii ollu riddo- ja vuotanservodagain.
Viidáseappot juolluduvvui buohkanassii 2 212 000 ru doarjjan eanadoalloulbmiliidda erenoamážit doaibmavisttiid ođasmahttimiidda ja viiddidemiide. Buorre lea go Sámedikki váikkuhangaskaoamit eanadoalu várás sáhttet veahkehit bisuhit sámi servodaga báikkálaš eanadoalu.
Duodjeulbmilii juolluduvvui 1 021 000 ruvdnosaš doarjja. Duodjevisteinvesteremat ja gealbudeapmi gullet Sámedikki vuoruhemiide bisuhit ja ovddidit duodjefitnodagaid.
Bálvalusealáhusaide juolluduvvui buohkanassii 1 860 000 ruvdnosaš doarjja. Dás stivrajođiheaddji ovdandoallá 254 000 ruvdnosaš doarjaga ČálliidLágádussii ásahit ossodaga Detnui girje- ja oahpponeavvobuvttadeami várás. Lagadus lea šiehtadan Sámedikkiin buvttadit oahpponeavvuid 5 miljon ruvnnu ovddas.
Kulturulbmiliid oktavuođas deattuhuvvo ahte juolluduvvui buohkanassii 540 000 ruvnnu doarjjan iešguđet kulturdoaibmabijuide. Das earret eará guovtti duohtavuođafilmma buvttadeapmái.
Mánáid bajásšaddaneavttuide juolluduvvo buohkanassii 566 500,- ru. Earret eará filbmii mii galgá geavahuvvot mánáidgárddis ja prošektii sámi nuoraid várás identitehta ja identitehtaovddideami birra.
Viidáseappot juolluduvvui 286 000 ru doarjjan Sámi Dáiddačehpiid Searvái buvttadit čájáhusaid searvvi 30-jagi ávvudeami oktavuođas.
Buohkanassii 200 000 ru juolluduvvui doarjjan iešguđetlágan revya/cabarea doaimmaide.
Giellaprošeavttaide juolluduvvui 306 000 ru.
Dollojuvvui maiddái čoahkkin Guovdageainnu suohkaniin gos muitaluvvui daid ealáhusdoaibmabijuid birra maiguin suohkan lea bargamin ja maid áigu álggahit. Dákkár čoahkkimat leat deaŧalaččat stivrii vai oahpásmuvvá suohkaniid ealáhuseallimii.