Soahti lea dagaheamen olmmošlaš roasu Gazas ja riikkaidgaskasaš servvodat ii biđe hehttet dán dili. Siviila olbmot goddojit go soahtamat leat sin ruovttu šilljus. Sis ii leat gosa báhtarit go Israel lea birastahttán Gaza ja olbmot eai beasa báhtui eai bombbain mat girdit bahčet eaige dábálaš militeara soalddátvalvviin.
- Dát dilli ii sáhte joatkašuvvat. ON, EU ja earát fertejit duođas čájehit politihkalaš dáhtu orostahttit dán roasu seammás. Ii ábut dán dilis ohcalit sivalaččaid, muhto baicce bidjat buot návccaid dasa ahte orustahttit soađi. Mánát ja dábálaš olbmot goddojit beaivválaččat ja nu leage dárbu orustahttit soađi, lohká sámediggepresideanta.
Dieđut mat geažuhit ahte Israel geavaha bombbaid main leat olu vearrát váikkuhus go dábálaš bombbain, suorggahahttá Olli. Maiddai tv-govat čájehit bombbaid mat dahket erenoamáš gillámuša siviila olbmuide. Dát vuorjá sámediggepresideantta garrasit.
- Jos leš duohta ahte dákkár vearjjuid geavahit guovlluin gos olu olbmot ásset, leat dát soahtekriminalitehta mii gáibida garra reakšuvnna Israela vuostá, lohká Olli. Su mielas Israel geavaha badjemearálaš fámu dan ektui maid nuppi bealli, Hamas, dahká iežas soahtedaguin.
Sámediggepresideanta sádde dál reivve sihke stáhtaministtar Jens Stoltenbergii ja olgoriikkaministtar Jonas Gahr Størii mas dáhttu Norgga eiseválddiid buot fámuin geahččalit orustahttit soađi. Olli dáhttu maid Norgga eiseválddiid garrasit ávžžuhit USA ođđa presideantta ráhkkanahttit ođđa šiehtadusaid main lea ulbmilin soabadit vai ráfi šaddá dán guovllus.