Válgalisttat galget leat logahallojuvvon Sámedikkis maŋimusat njukčamánu 31. b. 2009. Diet áigemearri lea joavdanáigi. Válgalista sáddojuvvo juogo poastta mielde, telefáksan dahje dolvojuvvo persovnnalaččat Sámediggái. Válgalisttas galgá almmuhuvvot ahte dat guoská sámediggeválgii. Listaevttohusas galgá leat bajilčála mii almmuha dan bellodaga dahje dan joavkku, mii lea ovddidan evttohusa ja guđe válgabiirii dat guoská. Jus listta lea dakkár sámepolitihkalaš organisašuvdna evttohan, mii lea logahallojuvvon Sámedikkis, de galgá bajilčállagis leat dat logahallojuvvon namma. Muđui ii galgga bajilčállaga sáhttit malssidit eará logahallojuvvon sámepolitihkalaš organisašuvnnain, logahallojuvvon politihkalaš bellodagain, dahje válgabiirre eará listaevttohusaid bajilčállagiin.
Buot listaevttohusain galget leat uhcimusat ovcci válljehahtti evttohasa nama válgabiirres. Biirriin gos leat gaskal guokte ja njeallje mandáhta, galget leat ovcci evttohasa listaevttohusas. Jus biirres leat 5 dahje eanet mandáhta, de sáhttá evttohasaid lohku buohkanassii leat guovtte geardde dan mađe. Válgalistta olbmot almmuhuvvojit ovdanamain, goargguin ja riegádanjagiin. Buot evttohasaid virgi dahje ássanbáiki galgá almmuhuvvot jus lea dárbu earuhit olbmuid. Válgalisttas ii(eai) galgga leat oktasaš evttohas(at) ovttainge eará válgalisttain. Oktasašlisttain sáhttá almmuhit ovttaskas evttohasaid gullevašvuođa daidda jovkkuide, mat leat evttohan sin.
Gáibádussan lea ahte válgalisttas galget leat uhcimusat 40 % goappá ge sohkabealis.
Dakkár organisašuvnnaid listaevttohusa, mat eai leat logahallojuvvon sámepolitihkalaš organisašuvdnan Sámedikkis, galget leat vuolláičállán uhcimusat 30 olbmo, geat leat Sámedikki jienastuslogus. Sii fertejit leat logahallojuvvon dan válgabiirres, gos lista evttohuvvo. Logahallojuvvon sámepolitihkalaš organisašuvnnaide lea doarvái ahte listaevttohusa leat vuolláičállán uhcimusat guovttis válgabiirre organisašuvnna báikkálašossodaga stivralahtuin. Listaevttohussii galgá leat almmuhuvvon luohttámušolmmoš oktan várreolbmuin evttohasaid gaskkas. Mielddusin listaevttohussii galgá biddjojuvvot lista mii čájeha evttohasaid ja evttoheaddjiid riegádanbeaivvi ja ássančujuhusa. Listaevttohus sáddejuvvo Sámediggái.
Listaevttohusa iskanlista:
Dan vuođul mii lea daddjojuvvon bajábealde, galgá listaevttohus:
- bajilčállagis almmuhit guoskevaš bellodaga/organisašuvnna
- almmuhit ahte dat guoská sámediggeválgii
- Evttohasat sáhttet leat dušše ovtta listtas sámediggeválgii
- Evttohasat galget leat almmuhuvvon ovdanamain, goargguin ja riegádanjagii, vejolaččat maiddái virggiin ja ássanbáikkiin
- Oktasašlisttain sáhttet maiddái evttohasaid gullevašvuohta leat almmuhuvvon
- sisttisdoallat uhcimusat 40 proseantta ovddastusa goappá ge sohkabealis
- sisttisdoallat luohttámušolbmo ja su várreolbmo nama daid olbmuid gaskkas geat leat vuolláičállán listaevttohusa
- almmuhit geat dat doibmet luohttámušlávdegoddin
- sisttisdoallat uhcimusat ovcci válljehahtti evttohasa válgabiirres. Biirriin gos leat gaskal guokte ja njeallje mandáhta, galget leat ovcci evttohasa listaevttohusas. Jus biirres leat 5 dahje eanet mandáhta, de sáhttá evttohasaid lohku buohkanassii leat guovtte geardde dan mađe.
Mielddusin čuovvot skovit juohke válgabiirre várás masa sáhttá čállit listaevttohasaid. Evttoheaddjit eai dárbbaš geavahit dáid skoviid, dat leat jurddašuvvon veahkkin listaevttoheaddjiide vai lista čuovvu ođđa válgaortnega láhkaásahusa.
Geahča muđui sámediggeválgga láhkaásahusa §§ 28 ja 29.