- Sámedikki ulbmil lea oččodit nana ja ealli sámi servodagaid bissovaš ássamiin ja máŋggabealat ealáhuseallimiin. Mis lea ealáhushutkama ja ealáhusovddideami lágideaddjin ja ovddideaddjin deaŧalaš ovddasvástádus ealáhusovddideamis sámi guovlluin. Lea lunddolaš ahte mii álggahat lagaš ovttasbarggu Innvašuvdna Norggain man ulbmil lea ovddidit fitnodat- ja servodatekonomalaččat gánnáhahtti ealáhusaid miehtá riikka, dadjá Sámedikki direktevra Rune Fjellheim.
Sámediggi ja Innovašuvdna Norga áiguba ovttasráđiid:
• Váikkuhit dan ahte áddejupmi dan birra mii lea beliid ovddasvástádus sámi guovlluid ealáhusovddideamis, buoriduvvo, ja beliid rolla servodatovddideaddjin nannejuvvo.
• Viidáseappot ovddidit buriid regionála ovddidan- ja ovttasbargoarenaid.
• Oktiiordnet diehtojuohkin-, oahpahus- ja movttiidahttinbarggu sámi gielddaid guovdu earret eará fierpmádaga bokte vásáhusgaskkusteami ja oahpahusa ektui.
• Bargat dan ala ahte eanet ollislaš almmolaš ealáhusveahki ovddiduvvo sámi guovlluin Norggas.
• Oktiiordnet váikkuhangaskaomiid geavaheami ja muđui gulahallat gaskaneaset prošeavttaid birra gustovaš lágaid ja njuolggadusaid ektui (omd. láhkamearrádusaid jávohisvuođageaskku birra, EEO stáhtadoarjjanjuolggadusaid birra jna.).
• Geahččalit doallat ovttalágan geavahusa daid doaibmabijuid oktavuođas main lea oktasaš ruhtadeapmi
Ovttasbarggu vuoruhuvvon suorggit:
• Mátkeealáhusat ja vásáhusealáhusat
• Eanandoallu ja boazodoallu
• Lotnolasealáhusat
• Duodji
• Kulturealáhusat
• Nissonolbmot ja nuorat ealáhusain
• Mariidnaealáhusat
Šiehtadus vuolláičállojuvvo 11.02.2009 Kárášjogas ja galgá leat fámus 2011 rádjai.
Maŋŋá vuolláičállima lea mediain ja earáin vejolašvuohta ovddidit gažaldagaid, loahpaha Sámedikki direktevra.