Vuosttaškonsuleanta/ráđđeaddi - Ref.nr. 09/719
Sámedikkis lea rabas sadjásaš virgi vuosttaškonsuleantan/ráđđeaddin 01.05.10 rádjái, mas lea álgin farggamusat. Bargobáiki lea okta Sámedikki kántorbáikkiin.
Virggi barggut leat e.e. ovddidit ja čuovvolit Sámedikki váikkuhangaskaoapmepolitihka, vuosttažettiin doarjjahálddašeami ealáhusovddideamis. Virgái sáhttet maiddái biddjot eará barggut mat gullet Sámedikki doibmii.
Virgái ohcat olbmo geas lea relevánta alit oahppu allaskuvllas/universitehtas, áinnas ekonomiijas, servodatfágas dahje sullásaš fágain. Bargovásáhusat almmolaš hálddašeamis ja gelbbolašvuohta sámegielas ja sámi kultuvrras deattuhuvvojit. Maiddái buorre fágalaš gelbbolašvuohta, ovttasbargo- ja gulahallannávccat, dás maiddái čálalaš ovdanbuktinnávccat, ja návccat bargat iehčanassii ja ulbmillaččat ja veahkkáivuohta deattuhuvvojit.
Virgi lea biddjon virgekodii 1408 vuosttaškonsuleanta dahje 1434 ráđđeaddi.
Lagat dieđuid virggi birra addet Audhild Schanche, Hege Fjellheim Sarre dahje Synnøve Solbakk, tel. 78 47 40 00.
Guokte ráđđeaddi/seniorráđđeaddi (nubbi almmuheapmi) - Ref. nr: 08/5098
Sámedikkis leat rahpasat guokte bistevaš virggi ráđđeaddin/seniorráđđeaddin, ovddemusat juristan, álgin farggamusat. Bargosadjin lea okta Sámedikki kantorbáikkiin.
Goappašiid virggiid bargamušat čatnasit riekteovddideapmái, juridihkalaš čielggademiide ja láhkabargui sáme- ja álgoálbmotrievttis. Nuppi virggi váldobargamušat čatnasit oahpahus-, kultur- ja álgoálbmotrievttálaš suorgái. Nuppi virggi váldobargamušat fas čatnasit eana- ja resursa-vuoigatvuođaide, dás maiddái digge-, biras ja areálahálddašanriekti. Goappašiid virggiide háliidit olmmošvuoigatvuohta ja hálddašanrievtti gelbbolašvuođa.
Virgái sávvat vuosttažettiin olbmuid geain lea juridihkalaš ámmáteksámen/master. Lea ovdamunni jus lea bargohárjehallan dan bargosuorggis. Olbmot geain lea servodatdieđalaš oahppu, ovddemusat váldofága/masterdásis ja relevánta bargohárjehallan sáhttet maid ohcat. Máhttu sámi servodatdili birra ja sámegielas deattuhuvvo. Lassin deattuhit buriid gelbbolašvuođaid, ovttasbargo- ja gulahallannávccaid, čálalaš ovdanbuktinnávccaid, návccaid bargat iešheanalaččat ja ulbmillaččat ja bálvalusdáhtu.
Bivdit ohcci almmuhit goappá virgái ohcá, dahje goappá virggi vuoruha. Virggit leat biddjojuvvon virgekodii 1434 ráđđeaddi dahje 1364 seniorráđđeaddi.
Lagat dieđuid virggiid birra addet ossodatdirektevrrat Julie Eira ja Audhild Schanche, tlf. 78 47 40 00.
Ráđđeaddi/seniorráđđeaddi - Ref. nr: 09/912
Sámedikkis lea rabas bistevaš virgi ráđđeaddin/seniorráđđeaddin, álgin farggamusat. Bargobáikin lea okta Sámedikki kontorbáikkiin.
Virgái gullet dakkár barggut go ovddidit Sámedikki ealáhuspolitihka ja váikkuhangaskaoapmepolitihka, dasa gullá doarjjahálddašeapmi, vuosttažettiin ealáhusdoarjagat. Virgái sáhttet maiddái biddjot eará barggut mat gullet Sámedikki doibmii.
Virgái ohcat olbmo geas lea guoskevaš alit oahppu allaskuvllas/universitehtas, ovddemusat váldofága- /masterdásis ja áinnas ekonomiijas, servodatoahpus dahje sullásaš. Vásáhusat almmolaš hálddahusas dahje eará relevánta bargovásáhusat, máhtolašvuohta sámi servodatdiliid birra ja gelbbolašvuohta sámegielas deattuhuvvojit. Lassin deattuhuvvojit buorit fágalaš gelbbolašvuođat, ovttasbargo- ja gulahallannávccat, čálalaš ovdanbuktinnávccat , návccat bargat iešheanalaččat ja ulbmillaččat ja bálvalusdáhttu.
Virgi lea biddjon virgekodii 1434 ráđđeaddi dahje 1364 seniorráđđeaddi.
Lagat dieđuid virggi birra addet Audhild Schanche, Hege Fjellheim Sarre dahje Synnøve Solbakk, tlf. 78474000.
Oktasaš buot virggiin:
Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkádusa agi ja sohkebeliid dáfus, ja rekrutteret olbmuid geain lea unnitlogu- ja álgoálbmotduogáš.
Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái.
Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 proseanttain jahkái gitta 25 000 ru rádjai, sii ožžot maiddái sierra vearrogessosa ja lassi mánáidoaju. Dát gustojit dassážiigo Stuorradiggi rievdada dáid ortnegiid.
Sámedikki bargiin lea máškidis bargoáigi. Ohccit geat eai hálddaš sámegiela go biddjojuvvojit virgái, sáhttet ovttasráđiid bargoaddiin geatnegahttojuvvot váldit oahpu sámegielas.
Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahččalanáigi. Bálkkás gessojuvvo 2 % Stáhta penšuvdnakássii.
Ohcanáigi lea: 04.03.09
Mii bivdit ohcciid almmuhit virggi referánsanummira. Ohcan ja CV oktan duođaštuvvon skuvla- ja bargoduođaštusaid máŋgosiiguin sáddejuvvojit: Sámediggi, Ávjovárgeaidnu 50, 9730 Kárášjohka.