- Lea dehálaš prinsihppa demokratiijii sihkkarastit njuolggo dokumeantageahččanlobi Sámedikki dokumeanttaide. Mii sávvat stuorát beroštumi ja searvama Sámedikki politihkalaš digaštallamiidda ja proseassaide. Dát sáhttá nanusmahttit álbmoga áddejumi sámi servodatgažaldagain, ja áiggi mielde lasihit Sámedikki jienastuslogu ja oasálastima Sámediggeválgii. Geahččanlohpi dahká vejolažžan duohtandahkat demokráhtalaš rievtti oasálastit Sámedikki mearridanproseassaide. Sámedikkis lea ovdalaččas rabas boastajournála iežas neahttasiidduin, muhto dál addojuvvo maid vejolašvuohta viežžat Sámedikki dokumeanttaid neahtas. Dat ahte addit njuolggo dokumeantageahččanlobi Sámedikki neahttasiidduin dagaha ahte Sámedikki rabasvuođapolitihkka manná guhkkelii go dat mii ođđa almmolašvuođalágas gáibiduvvo, lohká Sámedikki presideanta Egil Olli.
Sámedikki 2008 bušeahtas lea mearriduvvon ahte njuolggo dokumeantageahččanlohpi galgá rahppojuvvot Sámedikki elektrovnnalaš dokumeantavuorkkás. Láhkaásahus ođđa almmolašvuođaláhkii mearriduvvui golggotmánu 17. b. 2008 ja biddjui doibmii ođđajagemánu 1. b. 2009.