Ovdačoahkkin lea ráhkkaneapmi Bistevaš Foruma 8. sešuvdnii New Yorkis miessemánu 18. - 29. b. 2009. Dan oktavuođas háliida forum deaivvadit sámedikkiiguin ja Ruošša beale sámiiguin. Miessemánu 8. sešuvnna fáddán lea earret eará ONa álgoálbmotjulggaštusa implementeren ja beallebeaivásaš digaštallan Árktisa birra. Dollojuvvo maiddái rabas čoahkkin gaskal ONa Álgoálbmotáššiid Bistevaš Foruma ja sámi organisašuvnnaid/ásahusaid gaskavahku njukčamánu 18. b. dii. 15.00 Sámedikki Auditorias.
Maŋebárgga njukčamánu 17. b. dii. 18.00-19.00 lea várrejuvvon diibmu pressii/preassakonferánsii sámediggevistti čoahkkinlanjas nr. 128.
ONa Álgoálbmotáššiid Bistevaš Forum lea ONa ráđđeaddi orgána dakkár áššiin mat gusket álgoálbmogiidda. ONa ekonomalaš ja sosiála ráđđi (ECOSOC) ásahii Bistevaš Foruma jagis 2000. Ole Henrik Magga lei foruma vuosttaš jođiheddji áigodagas 2002-2004. Fora mandáha lea digaštallat álgoálbmotáššiid sosiála ovdánálgo, kultuvrra, birrasa, oahpu, dearvvašvuođa ja olmmošvuoigatvuođaid ektui.
Bistevaš Forum galgá:
• addit áššedovdi ráđiid ja rávvagiid ONa ekonomalaš ja sosiála ráđđái ja ONa vuogádaga iešguđet prográmmaide, foanddaide ja organisašuvnnaide
• nannet dihtomielalašvuođa doaimmaid birra mat gusket álgoálbmogiidda ja ovddidit dáid doaimmaid ovttaiduhttima ja oktiiordnáma; ONa vuogádaga siskkobealde
• ráhkadit ja juohkit dieđuid álgoálbmotáššiid birra
Preassagulahallit:
• Seniorráđđeaddi Leif Arnold Dunfjeld, tel. 78 47 40 00
• Ráđđeaddi Sara Marja Magga, tel. 78 47 40 00
Eanet dieđut leat dáin liŋkkain.