Sadjásašvirgi/prošeakta-/gieddejođiheaddji - Ref.nr. 09/1343, 09/1344 ja 09/1345
Mis lea rabas sadjásašvirgi 30.09.09 rádjái áššemeannudeaddjin mas álgin lea farggamusat. Kontorbáiki lea vuosttažettiin Ájluovttas (ref.nr. 09/1343). Sadjásašvirggi barggut leat hálddašit sámi kulturmuittuid iešguđetlágan plána- ja areálaáššiid áššemeannudeami ja báikediđoštallama bokte. Virgái sáhttet maiddái biddjojuvvot eará bargamušat mat gullet Sámedikki doibmii.
Jus ruhtadeapmi lea sajis de leat Sámedikkis rahpasat guokte prošeakta- /gieddejođiheaddjivirggi Finnmárkku ja Romssa gieddebargguide. Virgái gullet gieddebarggut ja ovda- ja maŋŋebarggut kulturmuitoregistrerenprošeavttaid ja stuorát huksenáššiid oktavuođas. Ovtta virgái sáhttet gullat máŋga prošeavtta /gieddebarggu. Virgái sáhttet maiddái biddjot eará barggut.
Nubbi prošeakta- /gieddejođiheaddjivirgi árvvoštallojuvvo guhkiduvvot sadjásašbargun áššemeannudeaddjin gitta 28.02.09, mas kontorbáiki lea vuosttažettiin Vuonnabahta (ref.nr. 09/1344). Virgái gullet seamma barggut go bajábeal sadjásašvirggis. Nubbi prošeakta-/gieddejođiheaddjivirgi lea miessemánus gitta 6 mánu ovddasguvlui, kontorbáiki vuosttažettiin Olmmáivákkis (Ref.nr. 09/1345).
Virgái ohcat olbmo geas lea guoskevaš alit oahppu, ovddemusat mastergráda-/váldofágadásis ja áinnas arkeologiijas/kulturmuitohálddašeamis, vásáhusat ja máhttu geavahit digitála giedderusttegiid (GIS/GPS/PDA). Gelbbolašvuohta sámi servodatdilis ja sámegielas deattuhuvvojit. Lassin deattuhit buriid fágalaš gelbbolašvuođaid, ovttasbargo- ja gulahallannávccaid, čálalaš ovdanbuktinnávccaid, návccaid bargat iešheanalaččat ja ulbmillaččat ja bálvalusdáhtu.
Virggit leat biddjon virgekodii 1408 vuosttaškonsuleanta, 1434 ráđđeaddi dahje 1364 seniorráđđeaddi.
Lagat dieđuid virggiid birra addet Audhild Schanche, Hege Fjellheim Sarre dahje Synnøve Solbakk, tlf. 78 47 40 00.
2 Geassebargi - Ref.nr. 09/1346 ja 09/1347
Mii dárbbašit guokte geassebargi miessemánu rájes čakčamánu rádjái, ja unnimusat 5 vahkkui, nubbi Olmmáivákki kontorbáikái (ref.nr. 09/1346) ja nubbi Vuonnabađa kontorbáikái (ref.nr. 09/1347).
Geassebargi barggut leat seamma go bajábeal sadjásašvirggis. Virggiide sávvat vuosttažettiin olbmuid geain lea relevánta alit oahppu ovddemusat unnimusat bachelordásis, vásáhusat áššemeannudeamis ja/dahje gieddebarggus ja geat máhttet geavahit digitála giedderusttegiid (GIS/GPS/PDA), ja geain lea gelbbolašvuohta sámi servodatdilis ja sámegielas. Olbmot geat eai olat álgogáibádusaid sáhttet maid ohcat, ja de mii ávžžuhit earenoamážit olbmui geat máhttet sámegiela ohcat. Lassin deattuhit buriid ovttasbargo- ja gulahallannávccaid ja návccaid bargat iešheanalaččat ja ulbmillaččat ja bálvalusdáhtu.
Virggit leat biddjon virgekodii 1065 konsuleanta, 1408 vuosttaškonsuleanta dahje 1434 ráđđeaddi.
Lagat dieđuid virggit birra addet Audhild Schanche, Hege Fjellheim Sarre dahje Synnøve Solbakk, tlf. 78 47 40 00.
Gieddebargit/ gieddeassisteanttat - Ref.nr: 09/1348
Mii dárbbašit maiddái gieddebargiid/gieddeassisteanttaid stuorát ja smávit gieddebargguide miehtá norgga bealde sámi ássanguovllu.
Virgái sávvat vuosttažettiin olbmuid geain lea relevánta alit oahppu ovddemusat unnimusat bachelordásis, vásáhusat gieddebarggus/kulturmuitoregistreremis ja geat máhttet geavahit digitála giedderusttegiid (GIS/GPS/PDA), ja geain lea gelbbolašvuohta sámi servodatdilis ja sámegielas. Lassin deattuhit buriid ovttasbargo- ja gulahallannávccaid ja návccaid bargat iešheanalaččat ja ulbmillaččat ja bálvalusdáhtu.
Virggit leat biddjon virgekodii 1065 konsuleanta, 1408 vuosttaškonsuleanta, 1434 ráđđeaddi dahje 1364 seniorráđđeaddi.
Lagat dieđuid virggiid birra addá Audhild Schanche, Hege Fjellheim Sarre dahje Synnøve Solbakk, tlf. 78 47 40 00.
Oktasaš buot virggiin:
Buot virggiide/gieddebargguide gáibiduvvo B klássa vuodjinkoarta.
Sámedikki hálddahus galgá nu bures go vejolaš speadjalastit álbmoga girjáivuođa. Bargiidpolitihkalaš ulbmilin lea juksat dássedis čoahkádusa agi ja sohkebeliid dáfus, ja rekrutteret olbmuid geain lea unnitlogu- ja álgoálbmotduogáš.
Sámediggi lea šiehtadan Čáhkkilis bargodili, dg. Inkluderende Arbeidsliv (IA), ja deattuha bargodiliid láhčima juohke bargái.
Buohkain geat ásset Finnmárkkus ja Davvi-Romssas lea vejolašvuohta oažžut oaniduvvot oahppoloana Stáhta loatnakássas 10 proseanttain jahkái gitta 25 000 ru rádjai, sii ožžot maiddái sierra vearrogessosa ja lassi mánáidoaju. Dát gustojit dassážiigo Stuorradiggi rievdada dáid ortnegiid.
Sámedikki bargiin lea máškidis bargoáigi. Ohccit geat eai hálddaš sámegiela go biddjojuvvojit virgái, sáhttet ovttasráđiid bargoaddiin geatnegahttojuvvot váldit oahpu sámegielas.
Muđui virgáduvvojit bargit gustojeaddji lágaid, njuolggadusaid ja šiehtadusaid vuođul, dás maiddái bálká ja penšuvdna, ja 6 mánu geahččalanáigi. Bálkkás gessojuvvo 2 % Stáhta penšuvdnakássii.
Mii bivdit ohcciid almmuhit virggi referánsanummira. Ohcan ja CV oktan duođaštuvvon skuvla- ja bargoduođaštusaid máŋgosiiguin sáddejuvvojit: Sámediggi, Ávjovárgeaidnu 50, 9730 Kárášjohka.