Ráđđehus lea davviguovlopolitihka strategalaš plánastis, "Ođđa huksengeađggit davvin" sakka eanet deattuhan doaibmabijuid álgoálbmogiid várás. Riddo- ja guolástusministtar Helga Pedersen deattuhii iežas ovdanbuktojumis ahte álgoálbmogiid kultuvra ja eallinvuođđu galgá nannejuvvot. Son čujuhii dasa ahte álgoálbmogiid árbedieđut leat mávssolaččat ja ovddastit áidnalunddot gelbbolašvuođa ássamii ja bargui davviguovlluin.
Presideanta Olli deattuha ahte Ráđđehus lohpida addit buriid rámmaeavttuid ealáhusovddideapmái smávva servodagain. Bargosajit sihkkarastet ássama ja addet smávva servodagaide vejolašvuođa ceavzit. - smávva báikegottit leat deaŧalaččat vai sámegielas ja sámi kultuvrras galgá leat buorre vejolašvuohta ceavzit boahtteáiggis. Danne lea duhtadeaddji ahte Ráđđehus áŋgiruššá giliiguin čiehkajuolgin davviguovlopolitihkastis, dadjá Olli.
Sierra álgoálbmotprográmma galgá ásahuvvot kulturvuđot ealáhusovddideapmái Barentsovttasbarggus. Mihttomearrin lea sihkkarastit buori ovddideami ja buoret vuođu servodatovddideapmái Baretnsovttasbarggus. Dás galget ealáhusvuođđudeamit, árvoháhkan ja ođđa kulturvuđot ealáhusat turismmas, gávppašeamis, smávvaindustriijas, árktalaš biepmus ja designas leat dat váikkuhangaskaoamit mat sihkkarastet ássama ja ovddideami davvin.
- Mun oainnán ahte Ráđđehus bidjá návccaid ovttasbargui allaskuvllaiguin, universitehtaiguin ja eará ásahusaiguin davvin. Dat lea duhtadeaddji. Báikkálaš čatnaseapmi ja báikkálaš oassálastit leat áibbas mearrideaddjin lihkostuvvamii. Ja dás lea dakkár ovttasbargu deaŧalaš, mas álgoálbmogat leat politihkalaš mieloassálastit, deattuha Olli.
Sámedikki presideanta čujuha dasa ahte Bargiidbellodat Sámedikkis lea gáibidan ahte ásahuvvojit etihkalaš norpmat ealáhusdoaimmaide álgoálbmotguovlluin. Danne son lea duhtavaš go Ráđđehus álggaha ráderasttideaddji barggu davviguovlluin mas ovddiduvvojit dakkár etihkalaš njuolggadusat, maid ealáhusdoaimmaheaddjit galget vuhtii váldit buot doaimmain álgoálbmotguovlluin.
-Dát lea mielde sihkkarastimin ahte álgoálbmotvuoigatvuođat atnojit árvvus go stuorra multinationála fitnodagat bohtet smávva, rašis álgoálbmot servodagaide davvin, čujuha Egil Olli.
Gulahalli: Egil Olli, tlf. 900 26 880
Bjarne Store-Jakobsen, tlf. 959 26 291