Sámedikki presideantta Egil Olli bealis šállošan go sus ii lean vejolašvuohta sávvat didjiide bures boahtima otne. Son lea čoahkkimis Oslos Norgga ráđđehusain, muhto son boahtá ruovttoluotta ihttin ja illudit dasa.
Forum lea gitta álggu rájes leamaš áibbas vealtameahttun deaŧalaš máilmmi eamiálbmogiidda. Forum lea lokten eamiálbmotáššiid bajás ON-vuogádagas, ja dan geažil oaččui ge eamiálbmot vuoigatvuođaid julggaštus nu viiddis doarjaga.
Sámediggi, mii galgá leat din čoahkkinbáikin dáid lagamus beivviid, ásahuvvui 1989:s. Mii sámit leimmet juo dalle rahčan ollu jagiid oažžut min vuođđovuoigatvuođaid dohkkehuvvot. Sámedikki bokte oaččuimet mii deaŧalaš sáhkaguoddi ja iežamet álbmotválljejuvvon orgána norgga bealde. Dat go mis lea sámediggi maiddái ruoŧa- ja suomabealde addá stuorra vejolašvuođaid rájáid rastá ovttasbargui. Dan oktavuođas lea deaŧalaš ahte maiddái ruošša beale sámit oččošedje ovddastusa seamma dásis go mis, davviriikkaid sámiin, lea.
Dán vahkus galgá mis leat oktasaš čoahkkin dinguin (gaskkal foruma, sámedikkiid ja ruošša beale sámiid ovddasteddjiiguin). Mu mielas šaddá gelddolaš gullat maid dii oaivvildehpet daid bohtosiidda ja hástalusaide mat mis leat dáppe. Dasto galgá leat rabas čoahkkin gos sámit ja sámi ásahusat ja organisašuvnnat besset din deaivat ja dinguin gulahallat. Jáhkan diet ge šaddá miellagiddevaš jurddalonuhallan ja digáštallan.
Mun háliidan norgga beale Sámedikki bealis geiget sámi biktasa - luhka - foruma buot lahtuide ja dan bokte čájehit giitevašvuođa sámi álbmoga bealis dan barggu ovddas maid dii dahkabehtet. Luhkka lea sámi árbevirolaš bivttas mii dábálaččat geavahuvvo eará biktasiid alde bivvun. Mun sávan ahte dát bivttas liggešii din miehtá dán vahku dáppe davvin Sámis. Dasto sávan mun ahte luhkka livččii didjiide fiina muitun Sámis boahtteáigái.
Sávan vel oktii bures boahtima Sámediggái ja sávan lihku foruma čoahkkimiiguin.