Sámi giellaguovddážat leat mávssolaš oasálastit ja ovttasbargit prográmma čáŋaheamis. Guovddážat sihkkarastet guovlluid oasálastima oahpus ja nie boahtá guovlluid iešvuohta ja suopmanat ovdan. Nie nannejuvvo maiddai iešguđet guovlluid čanasteapmi giellaprográmmii.
Ollesolbmuid giellaoahpaheapmi šaddá vuosttas oassi dán giellaoahpus. Nu leaba allaskuvla ja Sámediggi šiehttan.
-Rávisolbmot geat leat massán gielaset ožžot dál erenoamáš vejolašvuođa šaddat giellaguoddit fas, lohká várrepresideanta Marianne Balto. Son čujuha man váttis dillái váhnenolbmot šaddet go eai sáhte veahkehit mánáideaset ruovttubargguin sámegielat fágain. Danin leat dát olbmot guovddážis go sámegiella fas leavvá servvodahkii.
Allaskuvla lea hábmen sierra oahppoplána mii heive sihke dáidde geain ii leat lohkangelbbolašvuohta, vai sii geat hállet giela besset oahppat lohkat ja čállit sámegiela ja vai olbmot besset lohkat alit dásis jos háliidit.
-Mii doaivut dáinne vugiin háhkat sámegielat fágaolbmuid iešguđet surggiide sámi servvodahkii. Dán dárbbu eat nagot dál dustet ja danne leage nu dehálaš ahte čohkket buot searaid dán bargui. Dan mii dahkat go ovttas bargat giellaguovddážiiguin, lohká Balto.
Su niehku lea dágahit sámegiela beaivválaš giellan buot sámi giliin ja čiegain, ahte nuorat geavahišgohtet giela milloseabbot ja ahte ollesolbmot dain guovlluin gos dáruiduhttin leamaš lean vearrámus, hállagohtet fas sámegiela.
Gulahalli:
Várrepresideanta Marianne Balto, tlf: 480 63 358
Bjarne Store-Jakobsen tlf 959 26 291