SNPL lea dál plánemin stuorra áŋggirdeami oččodit eanebuid čálihit iežaset jienastuslohkui ovdal geassemánu 30. b., mii lea sisačáliheami áigemearri jus áigu jienastit dán jagi sámediggeválggas.
-Mii áigut johtit miehtá riikka ja deaivvadit nuoraiguin joatkkaskuvllain ja lágidemiin. Mis galget leat diehtoloavkkut, mii áigut fitnat luohkálanjain, hálešit min ovttaahkohaččaiguin ja gullat maid sii dadjet ja mii áigut muitalit sidjiide jienastuslogu birra. Mii áigut maid ráhkadit videoáŋggirdeami - youtube lea dás okta dain čoavddasániin! dadjá SNPL lahttu Sandra Nystø Ráhka movttegit.
-Mii leat hui ilus go leat ožžon doarjaga dán áŋggireapmái go mii diehtit ahte ollu nuorat eai leat čálihan iežaset Sámedikki jienastuslohkui, dadjá Sandra.
Sullasaš áŋggirdeami vuođul Ruoŧa bealde ledje dain 1000 ođđačáliheamis 500 nuora.
-Go čálihat iežat jienastuslohkui, de du jietna gullo ja dat mielddisbuktá ahte politihkkárat fertejit guldalit min! loahpa Sandra Nystø Ráhka.
Dieđuid dan birra mo čálihit iežas jienastuslohkui, gávnnat dáppe: www.facebook.com - čále ohcanruktui "Sametingets ungdomspolitske utvalg" dahje oza dás: www.samediggi.no
Buot sápmelaččain Norggas, geat leat 18 jagi boarrásat dahje devdet 18 jagi válgajagi, lea vuoigatvuohta čálihit iežaset jienastuslohkui. Vai beassá jienastit válggas, de galgá leat čálihuvvon jienastuslohkui ovdal áigemeari mii lea geassemánu 30. b.
Gulahalli:
SNPL mielláhttu Sandra Nystø Ráhka, tel. 91792900