- Sámi servodat dárbbaša eanet oahpaheddjiid mánáidgárddiide ja skuvllaide, lohká Sámediggeráđi Hilde Nyvoll.
Dát leat dehálaš institušuvnnat mat min mánáid bokte viidáset fievrridit sámi gielaid ja kultuvrra, muhto oahpaheddjiid haga geat máhttet oahpahit sámi giela ja gillii sáhttá dát mannolat bisánit. Dan sivas leat mii álggahan "Gollevirgi" -kampánja oččodeapmái ja sávvat ahte eambbosat áigot váldit oahpaheaddjeoahpu, loahpaha Nyvoll.
Sámediggi lea dahkan ovttasbargošiehtadusa Sámi allaskuvllain ovdánahttit ja čađahit 5- jagi rávisolbmooahpahusprográmma. Dán oktavuođas lea Sámi allaskuvla hábmen kursaráiddu mii addá ii- sámegielat olbmuide vejolašvuođa hukset iežaset giellagelbbolašvuođa. Kursaráiddus leat álgooahppu 1 ja 2 ja sámegiela lohkanbadjeoahppu. Maŋŋil ceavzán eksámeniid sámegiela lohkanbadjeoahpus lea studeanttain doarvái gelbbolašvuohta álgit dábálaš oahpuide mat čađahuvvojit sámegillii. Allaskuvla ovttasbargá sámi giellaguovddážiiguin miehtá riikka.
Sámediggi juolluda stipeanddaid studeanttaide geat váldet ovdaskuvla- ja dábálaš- oahpaheaddjeoahpu gos sámegiella lea fágalaš oassin ja dát ortnet doaibmá miehtá riikka.
Oktavuođaolmmoš :
Ráđđelahttu Hilde Anita Nyvoll, tlf: 918 07 130