Dieđáhusa ulbmilin lea bidjat vuođu sámi dearvvašvuođa- ja sosiálapolitihka bajimuš ságaškuššamii. Dieđáhusas čilgejuvvo boahtteáiggi strategalaš dearvvašvuođa- ja sosiálapolitihkalaš bargu Sámedikkis.
– Lean hui ilus go Sámediggeráđđi dál ovddida dán dieđáhusa, ja vuorddán mielas ságastallama Sámedikki dievasčoahkkimis miessemánu loahpas. Mun doaivvun strategiija maid mii plánet váikkuha ahte bargu ollislaš ja dássásaš bálvalusain sámi álbmoga váste šaddá álkit ja beaktileappot, dadjá várrepresideanta Ragnhild L. Nystad.
Sámediggeráđđi oaivvilda ahta ovddasvástádus dearvvašvuođa- ja sosiálabálvalusaid ovddideames ja kvalitehta sihkkarastimis sámi álbmoga váste ferte eambbo loktejuvvot ovttaskas olbmuid dásis bajimuš dássái.
- Lea ain stuorra dárbu ahte fágabargiin, buot dásiin servodagas, lea máhtolašvuohta sámi gielas ja kultuvrras. Máhtolašvuohta goappatge gielas ja kultuvrras dahká gulahallama vejolažžan, ja máŋggakultuvrralaš áddejupmi unnuda vejolaš gulahallanváttisvuođaid, dádja Nystad.