Sámediggi lea juolludan 2 630 000 ru15 sierralágan dearvvašvuođa- ja sosiálaprošeavttaide. Sihke mátta-, julev- ja davvisámi guovlluin leat ožžon doarjaga dearvvašvuođa- ja sosiálaprošeavttaide. Daid gaskkas lea Árran julevsáme guovdasj ožžon badjel 300 000 ru álggahit dearvvašvuođadeaivvadeami sámi boarrásiidda julevsámi guovllus, ja Várdobáiki lea ožžon doarjaga gelbbolašvuođa bajidandoaibmabijuide dearvvašvuođa- ja sosiálafága bargiide guovllus. Dasto lea gárrenávdnasiid boastutgeavaheddjiid beroštupmiorganisašuvdna Porsáŋggus ožžon doarjaga ovdaprošektii man oktavuođas geavaheaddjit, veahkkeapparáhta ja fágaolbmot ovttas barget doaibmabijuid hárrái maid bokte veahkehit gárrenávdnasiid boastutgeavaheddjiid eret gárrenávnnasgeavaheamis. Doarjjastivrra jođiheaddji Ann Mari Thomassen deattuha ahte prošeaktaruđat maid Sámediggi juohká dearvvašvuođa- ja sosiála oktavuođas lea deaŧalaš oassi dearvvašvuođa- ja sosiálabálvalusaid buorebut láhčimis sámi geavaheddjiide.
- Danne leat mii hui duhtavaččat go sáhttit addit doarjaga nu ollu buriide prošeavttaide. Mii diehtit earret eará ahte sámi pasieanttat máttasámi guovlluin vásihit dan ahte sin sámi duogáš ii vuhtii váldojuvvo oktavuođas dearvvašvuođa- ja sosiáladoaimmahagain. Danne illudahttá go sáhttit addit doarjaga bissovaš resursaguovddáža plánemii dearvvašvuođa- ja sosiálaáššiid várás máttasámi guovllus"dadjá Thomassen.
Sámediggi lea juohkán vuollel 2 miljon ru 22 doaibmabidjui sámi kulturmuitosuodjaleami oktavuođas. Dáid ruđaid váldomihttomearrin lea váikkuhit sámi kulturmuittuid ja -birrasiid gáhttema, suodjaleami ja oainnusin dahkama. Doarjagiid juohkimis leat deattuhuvvon prošeavttat mat gusket automáhtalaččat ráfáidahttojuvvon sámi kulturmuittuid ja kulturbirrasa registeremii, ja prošeavttaide mat gusket áitojuvvon sámi kulturmuittuid sihkkarastimii ja ođasteapmái. Sámediggi lea juolludan doarjaga prošeavttaide miehtá Sámi Deanu rájes davveoarjin gitta Hedmárkku rádjai máddin. Doarjjastivrra jođiheaddji Ann Mari Thomassen lea hui duhtavaš daiguin prošeavttaiguin mat leat ožžon doarjaga, sihke prošeavttaid fágalaš sisdoalu ja geografalaš viidodaga dáfus.
- Sámi kulturmuittut leat sámi historjjá deaŧalaš duođaštanávdnasat ja sámi kulturmuittuid registrerema, ođasteami ja sihkkarastima bokte váikkuhit mii seammás dan ahte sámi kultuvra ja identitehta oainnusin dahkkojuvvo, nannejuvvo ja viidáset ovddiduvvo ", dadjá Thomassen.
Son čujuha viidáseappot ahte illudahttá hui sakka dat go maiddái prošeavttaide guhkkelis máddelis nugo Hedmárkkus lea addojuvvon doarjja, go doarjja lea addojuvvon sámi kulturmuittuid registreremii Forollhogna álbmotmeahcis, mii guoskkaha guhtta gieldda Hedmárkkus ja Mátta-Trøndelagas.
- Dán lágan prošeavttat sáhttet nannet kultuvrralaš dihtomielalašvuođa mii dáhpáhuvvá Sámis máddeleamos osiin", dadjá Thomassen.
Dasto lea addojuvvon doarjja maiddái fierbmeáitti ja dimpparviesu ođasteapmái Deanu gielddas, ja náveha ođasteapmái Gáivuona suohkanis.