Máhttodepartemeanttas ja Sámedikkis leat leamaš konsultašuvnnat stuorradiggedieđáhusa doaibmabijuid hárrái dutkama birra, maid Ráđđehus ovddidii otne. Stuorradiggedieđáhusas válddahallojuvvo sámi dutkan ja das čujuhuvvo earret eará ahte sámi servodagas leat stuorra hástalusat máhtolašvuođa dáfus go galgá sáhttit dulkot ja stivret iežas eallindili ja servodatovddideami.
- Máhttodepartemeanttas ja Sámedikkis galget leat konsultašuvnnat sámi dutkanlávdegotti mandáhta ja čoahkkádusa birra. Čielggas lea ahte lávdegoddi galgá gozihit visotsámi ja riikkaidgaskasaš eamiálbmotperspektiivva. Diehttelas lea maiddái ahte Sámi allaskuvla lea áibbas guovddážis go rámmat strategalaš ovttasbarggus ja ásahushuksemis árvvoštallojuvvojit, dadjá ráđđelahttu Nyvoll.
- Dat ovttaoaivilvuohta mii mis dál lea šaddan, lea njuolga daid doaibmabijuid čuovvoleapmi mat leat Sámediggeráđi sámi ásahusdieđáhusas ja dainna lágiin láhččojuvvo dilli sámi dutkama ovddideapmái viidáseappot, dadjá duhtavaš Hilde Nyvoll.